Este servizo reforza a atención directa á poboación e contribúe a mellorar o acceso aos servizos públicos, consolidando a cooperación entre administracións en beneficio do interese xeral.
O equipo de VIDOC – Oficinas Itinerantes da Policía Nacional – renova o servizo de expedición e renovación do Documento Nacional de Identidade (DNI) e do PASAPORTE en colaboración cos concellos, facilitando así á cidadanía a realización deste trámite nun só procedemento e sen necesidade de desprazarse a outras localidades.
Grazas a este servizo, os veciños de Baiona poderán renovar ou obter o seu DNI de maneira cómoda, rápida e próxima, evitando desprazamentos innecesarios e reducindo os tempos de espera habituais. Esta iniciativa forma parte do compromiso da Policía Nacional de achegar os servizos públicos esenciais á poboación, especialmente en municipios onde non existe unha oficina permanente de expedición de documentación.
A xornada de renovación e expedición de documentos terá lugar o vindeiro martes, día 27 de xaneiro, no espazo habilitado na entrada ao Parador de Baiona, situado na Avenida Arquitecto Jesús Valverde.
Para poder acceder a este servizo deberá concertar cita previa, chamando ao teléfono 986358011, ou ben presencialmente nas oficinas da policía local, en horario de 8.00 a 14.00 horas.
Desde o Concello de Baiona valórase moi positivamente a continuación deste servizo e agradécese a colaboración tanto da Policía Nacional como da cidadanía, cuxa implicación permite que este tipo de iniciativas sigan desenvolvéndose con éxito. Así mesmo, anímase a todos os veciños que teñan a súa documentación próxima a caducar ou necesiten obtela por primeira vez a aproveitar esta oportunidade para realizar o trámite de forma sinxela e próxima ao seu domicilio.
