O Concello de Mos, a través de Mos Axuda, e en colaboración con EVD Galicia, impulsa un ano máis a iniciativa solidaria “Magos e Estrelas”, un programa que ten como obxectivo levar ilusión, agarimo e compañía a persoas en situación de vulnerabilidade durante as festas do Nadal.
Esta acción solidaria fai un chamamento á participación da veciñanza como Magos, persoas voluntarias que queiran contribuír a facer máis especiais estas datas para as Estrelas:
• Nenos e nenas de entre 0 e 17 anos en situación vulnerable, aos que se lles fará chegar un agasallo cargado de ilusión.
• Persoas maiores que poden pasar o Nadal en soidade, ás que se lles fará chegar unha felicitación de Nadal escrita con agarimo e proximidade.
Unha vez formalizada a inscrición, cada persoa participante recibirá a asignación da súa Estrela, así como a información dos Puntos Máxicos, espazos habilitados para depositar os agasallos ou as cartas e garantir así que cheguen a tempo aos seus destinatarios.
Desde o Concello de Mos destacan a importancia deste tipo de iniciativas, que reforzan os valores da solidariedade, da empatía e do compromiso social, especialmente nunhas datas tan sinaladas como o Nadal, e animan á cidadanía a participar activamente.
As persoas interesadas en formar parte desta cadea solidaria poden inscribirse a través do seguinte formulario:
Como funciona Magos e Estrelas?
– Regalo de Reis Magos
As persoas participantes poden converterse en Magos para que unha Estrela —nenos e nenas de entre 0 e 17 anos— reciba un agasallo o Día de Reis.
O proceso é sinxelo: cómpre cubrir o formulario de inscrición, converténdose automaticamente en Mago; nos días seguintes, a persoa voluntaria recibirá por correo electrónico a carta da Estrela asignada. O orzamento do agasallo sitúase entre 25 e 40 euros. Unha vez preparado, o agasallo deberá entregarse nun Punto Máxico (EVD Galicia Mos, EVD Galicia Crecente ou entidades colaboradoras).
Desde a organización encárganse de que o 6 de xaneiro cada Estrela reciba o seu agasallo e poida vivir un Día de Reis cheo de ilusión.
-Felicitación polas festas
A segunda modalidade está dirixida a acompañar a persoas maiores en situación de soidade, facendo que reciban unha felicitación de Nadal cargada de afecto.
Neste caso: tras cubrir o formulario, a persoa voluntaria converterase en Mago; recibirá o nome da súa Estrela e, sempre respectando a súa privacidade, unha breve descrición.
A felicitación poderá enviarse por correo postal ou entregarse nun Punto Máxico (EVD Galicia Mos ou EVD Galicia Crecente; proximamente anunciaranse novos puntos na Cañiza, Arbo, Vigo e arredores).
O Concello de Mos, Mos Axuda e EVD Galicia agradecen a implicación de todas as persoas voluntarias que fan posible que a maxia do Nadal chegue a quen máis o precisa.
