• Destinarase principalmente a garantir o correcto funcionamento dos servizos sociais e a mellorar a atención ás persoas usuarias do Servizo de Axuda a Domicilio, así como á adquisición de recursos.
• A alcaldesa, Ana María López, afirma que “este investimento supón un paso importante na mellora dos nosos servizos sociais, apostando por unha atención máis digna e adaptada”.
O Concello de Cariño aprobou o Plan de Obras e Servizos (POS+) 2026 da Deputación provincial da Coruña destinado a gasto social, unha achega que permitirá cubrir os gastos derivados da prestación dos servizos sociais municipais.
A contía total ascende a 49.138,45 euros, que se destinará principalmente a garantir o correcto funcionamento dos servizos sociais e a mellorar a atención ás persoas usuarias do Servizo de Axuda a Domicilio (SAD).
Como novidade, leste é o primeiro ano no que unha parte do POS+ empregarase para a dotación de recursos materiais, concretamente para a adquisición de catro guindastres e dous asentos giratorios de baño, co obxectivo de dar resposta ás necesidades das persoas usuarias con maior grao de dependencia. Estes novos recursos permitirán facilitar o traballo que realizan as profesionais do SAD, mellorando tanto a calidade do servizo prestado como as condicións laborais do persoal.
A alcaldesa de Cariño, Ana María López, destacou que “este investimento supón un paso importante na mellora dos nosos servizos sociais, apostando por unha atención máis digna e adaptada ás necesidades reais das persoas máis dependentes”. Así mesmo, sinalou que “a intención do Concello é continuar nesta liña nos próximos anos, incrementando progresivamente estes recursos en función das necesidades que nos traslade o departamento de Servizos Sociais”.
