- Establecerá un sistema de pago para garantir a calidade do servizo e a sustentabilidade do espazo termal: 7 € por entrada ordinaria e abonos de 25€ para todo o mes
- Prevé que as instalacións poidan reabrir as súas portas ao público nun prazo de entre dous e tres meses.
A Xunta de Goberno Local do Concello de Ourense aprobou este mediodía o proxecto de ordenanza reguladora do servizo e dos prezos públicos da piscina termal das Burgas. O goberno local remitirá o documento aos grupos políticos municipais, que disporán dun prazo de 10 días para presentar emendas, antes de que o texto da ordenanza sexa presentado para a súa aprobación inicial por parte do Pleno do Concello. O goberno local prevé que o espazo termal poida reabrir as súas portas nun prazo de entre dous e tres meses.
O proxecto de normativa ten por obxecto regular a utilización da piscina lúdico-termal municipal, incluíndo o réxime de prezos públicos esixibles pola dita utilización e os dereitos e deberes das persoas usuarias. A motivación do establecemento de prezos públicos vén dada tanto pola necesidade de garantir a sustentabilidade financeira do servizo, asegurando a disposición de recursos suficientes para garantir unha prestación de calidade, como pola de racionalizar a súa utilización, segundo explica a proposta aprobada hoxe pola Xunta de Goberno.
A este respecto, desde o goberno municipal explican que o modelo anterior, de uso gratuíto, “ten moitísimas deficiencias e non funciona de forma óptima”, e sosteñen que, ao tratarse dun servizo que non atende unha necesidade básica, “é moito máis xusto” que as persoas que utilicen as instalacións paguen unha tarifa que contribúa a compensar os custos e garantir a súa viabilidade.
As tarifas dos prezos públicos serán:
- Entrada ordinaria: 7 € (para maiores de 15 anos). Dá dereito a usar as instalacións durante dúas horas no día para o que se adquira.
- Abono mensual: 25 €. Dá dereito a utilizala todos os días do mes natural, durante 2 horas diarias.
- Menores de 15 anos: Están exentos do pago do prezo público, pero deben entrar acompañados, polo menos, dunha persoa adulta.
O proxecto de ordenanza deixa aberta a posibilidade de que se poidan aprobar bonificacións para determinados colectivos sociais, mediante acordo da Comisión de Pleno. Así mesmo, a ordenanza deixa aberta a posibilidade de que o Concello preste este servizo por xestión directa ou indirecta.
En canto ás normas de uso da piscina municipal, recóllense as esixidas para garantir a seguridade e hixiene nas instalacións, establecendo un límite máximo de dúas horas diarias. O obxectivo é garantir tanto a rotación dos usuarios, permitindo o acceso a un maior número de persoas, como un uso saudable da piscina termal. Establécese, ademais, un cadro de infraccións e sancións en caso de incumprimento, así como a posibilidade de adopción de medidas de expulsión das persoas presuntamente infractoras.
Outros acordos da Xunta de Goberno Local
Na súa sesión ordinaria desta semana, a Xunta de Goberno Local aprobou outros 20 acordos:
- Licenzas e aperturas (4). Concedeu 2 licenzas: para un local comercial e para un restaurante; denegou outra: para unha reorganización de parcelas rústicas, e declarou a caducidade dun expediente de solicitude de licenza.
- Disciplina (2). Declarou en situación de ruína e acordou a demolición de dous inmobles, nas rúas Santa Mariña e A Granxa de Cudeiro.
- Infraestruturas (1). Aprobou a revisión excepcional de prezos relativa ao contrato das obras do “Proxecto de acondicionamento da Avenida Pardo de Cela”.
- Artes e festexos (1). Aprobou a xustificación do anticipo de caixa fixa desta área municipal correspondente ao último trimestre de 2025.
- Avogacía consistorial (12). Deu conta dunha sentenza ditada polo Tribunal Superior de Xustiza de Galicia, de 7 sentenzas e 2 autos ditados polo Xulgado do Contencioso-Administrativo número 1 de Ourense e dun auto do Contencioso-Administrativo número 2. Tamén foi informada de que o Concello deberá comparecer diante do Xulgado Central Contencioso-Administrativo número 7 de Madrid nun procedemento abreviado.
Retirouse da orde do día o expediente relativo á modificación non substancial número 2 do contrato de subministración de bicicletas eléctricas, estacións e ancoraxes para o servizo de alugueiro de bicicletas do Concello.
