- A Concellería de Educación organiza obradoiros previos nos centros para preparar as tradicionais figuras de compadres e comadres.
- O acto central terá lugar o xoves 12 de febreiro con música, dinamización e as habituais “loitas” rituais.
O Concello de Ourense, a través da Concellería de Educación, xa ten todo listo para dar a saída ao Entroido escolar. O vindeiro 12 de febreiro, a Praza Maior converterase no epicentro da festa coa celebración do tradicional Xoves de Comadres, unha cita que recupera as raíces da nosa cultura popular entre os máis cativos.
Nesta edición participarán aproximadamente 340 alumnos e alumnas de 1º, 2º, 3º e 4º curso de Educación Primaria, así como de Educación Especial, procedentes de oito centros de ensino da cidade: Vistahermosa, Mestre Vide, Manuel Sueiro, As Mercedes, O Couto, Maristas e o CEE Miño.
Preparación nos centros e xornada festiva
Para garantir que a tradición se manteña viva e con rigor, os días previos á celebración realizaranse nos propios colexios diversos obradoiros impartidos por persoal especializado. Nestas sesións, o alumnado contará con todo o material necesario para elaborar os seus compadres e comadres, aprendendo o significado histórico desta festividade.
O evento principal do día 12 de febreiro terá lugar entre as 11.30 h e as 13.00 h. A programación prevista para a mañá na Praza Maior inclúe:
- 11.30 h: Inicio das loitas de compadres, nas que as nenas deberán defender as súas figuras ante os intentos dos nenos por facerse con elas.
- 12.00 h: Quenda para as loitas de comadres, onde os nenos asumirán o papel de protectores das súas figuras fronte ás nenas.
A xornada estará amenizada con música en directo e actividades de dinamización, creando un ambiente de ledicia e convivencia arredor dunha das festas máis senlleiras da identidade de Ourense.
