- “Queremos seguir demostrando que outro turismo é posible”, expresou Santiso
- A Reserva presentou a súa campaña “Ou noso corazón verde”, coas empresas certificadas como protagonistas
- Mariñas Coruñesas é o segundo xeodestino de Galicia que máis crece, revelou Merelles
A Reserva de Biosfera Mariñas Coruñesas desembarcou en Fitur cunha folla de roteiro claro: consolidar a súa posición como o primeiro destino de Galicia certificado no Club de Ecoturismo de España. Para iso, a entidade reforza a súa aposta por unha oferta baseada na calidade, desestacionalizada e en comuñón co medio ambiente.
O presidente da Reserva, José Antonio Santiso, expuxo os grandes eixos para este ano, ao que cualificou de “especialmente importante porque consolidaremos proxectos, activaremos novas liñas de traballo e reforzaremos a nosa visibilidade exterior”. O plan de ecoturismo náutico e as propostas como Destino Starlight serán fitos durante o 2026, avanzou.
O presidente anunciou que na primavera se inaugurará a primeira Base de Actividades Ecoturísticas da Reserva, un complexo que estará situada en Betanzos a beiras do Mandeo, un dos principais ríos que vertebra o territorio desde o seu nacemento ata a súa desembocadura. Esta base nace cunha vocación clara: converterse nun punto de referencia para o desenvolvemento ordenado de actividades ecoturísticas, especialmente vinculadas ao medio natural e ao ámbito náutico.
Será un espazo desde o que compatibilizar o uso público do litoral coa conservación rigorosa da contorna. Un lugar para a educación ambiental, a sensibilización, conservación e investigación ambiental, así como tamén para o goce responsable do patrimonio por parte dos cidadáns e turistas.
“Esta infraestrutura representa un paso decisivo na consolidación do noso modelo de destino, dotándoo de ferramentas reais que nos permitan crecer sen perder identidade, e todo iso, baixo a estratexia do noso Plan de Sustentabilidade Turística”, apuntou.
O destino de referencia para a Eclipse Solar 2026
Como Destino Turístico Starlight, a Reserva aproveitará o fenómeno astronómico do ano: a Eclipse Solar total. Mariñas Coruñesas posiciónase como un dos mellores lugares de España para a súa observación.
O programa incluirá talleres e xornadas divulgativas, menús starlight en restaurantes da Biosfera e novas experiencias ecoturísticas deseñadas especificamente para a observación do firmamento.
As actividades realizaranse nos meses previos a este acontecemento, ademais de ter unha cobertura especial no día da eclipse solar total.
Pegada de carbono
Finalmente, Santiso puxo en valor a Bolsa de Proxectos de Compensación de Pegada de Carbono. Trátase dunha ferramenta de xestión pioneira onde administracións, empresas e particulares poden investir na mellora paisaxística e ambiental do territorio, fortalecendo o modelo de ecoturismo como motor de rexeneración natural.
“Somos un exemplo de que outro turismo é posible. Un turismo que coida, que escoita e que constrúe futuro. E queremos seguir séndoo”, concluíu.
O noso corazón verde
A Reserva tamén presentou a nova campaña promocional “Ou noso corazón Verde”. Este proxecto busca dar visibilidade ás 114 empresas da Marca de Calidade e ás experiencias de ecoturismo xa certificadas. A campaña céntrase nos meses non estivais para fomentar a desestacionalización, demostrando que o patrimonio natural e cultural das Mariñas é un recurso vivo os 365 días do ano.
López sinalou que “Ou Noso Corazón Verde” “é moito máis que unha acción de márketing, é unha declaración de intencións”. “O corazón verde simboliza a esencia do noso territorio: a natureza, si, pero tamén as persoas que a habitan, cóidana e mantéñena viva”, apuntou. De aí, que os protagonistas da campaña sexan persoas, familias que forman parte de empresas da Marca de Calidade, e que cada día levan a Reserva de Biosfera na súa filosofía.
Crecemento dun 13% de visitantes
Na presentación tamén interveu o director xeral de Turismo de Galicia, Xosé Manuel Merelles, que cualificou a Mariñas Coruñesas de “exemplo” polo seu traballo para conxugar o turismo coa sustentabilidade. Destacou as boas cifras de visitantes, situándose como o segundo xeodestino galego que máis crece, cun 13% máis de visitantes.
Merelles apuntou que o aumento é especialmente significativo a nivel de turistas con procedencia internacional. O director fixo fincapé na importante lograr esta identidade como reserva a poucos quilómetros dunha gran cidade.
