Podemos Ourense rexistrou unha moción no Concello de Ourense en apoio á regularización extraordinaria das persoas migrantes que viven e traballan no Estado español en situación administrativa irregular. A iniciativa defende a regularización como unha medida de xustiza social, de garantía dos dereitos humanos e de fortalecemento da convivencia democrática.
Desde Podemos Ourense lembran que milleiros de persoas migrantes forman parte activa da vida social, económica e comunitaria da cidade, traballando en sectores esenciais como os coidados, a agricultura, a hostalaría ou os servizos, pero véndose obrigadas a facelo en condicións de precariedade e vulnerabilidade debido á falta de autorización administrativa. “A irregularidade administrativa non é un delito, pero si unha situación que xera explotación, medo e indefensión, e que acaba afectando ao conxunto da sociedade”, sinalan.
A moción enmárcase no acordo acadado entre Podemos e o Goberno de España para impulsar unha regularización extraordinaria de persoas migrantes, unha medida historicamente demandada por organizacións sociais, colectivos de persoas migrantes, sindicatos e entidades defensoras dos dereitos humanos. Este acordo supón un paso decisivo para avanzar cara a un modelo migratorio baseado na igualdade de dereitos e no respecto á dignidade humana.
Así mesmo, o texto recolle o amplo consenso social existente a favor desta regularización, expresado recentemente a través dunha Iniciativa Lexislativa Popular respaldada por centos de milleiros de sinaturas en todo o Estado.
A iniciativa subliña tamén o papel clave dos concellos como administracións máis próximas á cidadanía, reclamando que o Concello de Ourense se implique activamente na acreditación do arraigamento das persoas migrantes e na defensa dos seus dereitos. A moción condena de forma expresa o racismo, a xenofobia e os discursos de odio que criminalizan a migración e deterioran a convivencia.
Para Podemos Ourense, apoiar a regularización extraordinaria é apostar por unha cidade máis xusta, cohesionada e igualitaria. “Defender os dereitos das persoas migrantes é defender un Ourense que non deixe a ninguén atrás e que sitúe a dignidade humana no centro das políticas públicas”, conclúen.
