Estas axudas, que entraron nesta semana en vigor no concello de Soutomaior, teñen como obxectivo principal dar garantías ás persoas que máis o precisan.
O alcalde, Manu Lourenzo, e a concelleira de Benestar Social, Rosana Martínez Boullosa, anunciaron hoxe que esta semana xa entrou en vigor a ordenanza que regula as axudas de emerxencia social do concello de Soutomaior.
Estas axudas, tal e como dixo o alcalde, Manu Lourenzo, conseguen dar garantías ás persoas que máis o precisan, “con esta ordenanza as veciñas e veciños de Soutomaior que estean en situación de emerxencia poden acceder a estas axudas con garantía, discreción e amparo xurídico”.
O alcalde ten claro que “dende Soutomaior queremos que as nosas veciñas e veciños que máis o precisen teñan do seu lado ao concello para resolver estas situacións de emerxencia, con esta ordenanza contamos cunha maior axilidade, eficacia e operatividade á hora de atender á veciñanza que máis o precisa”.
As axudas de emerxencia social son axudas puntuais para afrontar necesitades básicas urxente. Solicítanse nos Servizos Sociais do concello, no Centro de Benestar Integrado (Multiúsos) en horario de 9:00 a 14:00h. Estas axudas cobren dende alugueres, facturas, alimentación… ata necesidades de saúde non cubertas.
