• O párroco levaba 45 anos ao servizo de Cariño.
• O Concello acordou a suspensión de todos os actos festivos organizados pola administración municipal con motivo da Romaría de San Xiao do Trebo.
Don Paco, como todos coñeciámolo, dedicou durante 45 anos a súa vida ao servizo de Cariño e foi moito máis que o párroco do municipio. Soubo gañarse o respecto e o agarimo de todas e todos a través da súa proximidade, da súa sinxeleza e da súa permanente disposición a axudar a quen o necesitase. A súa perda deixa un baleiro difícil de encher, tanto nas rúas do municipio como na memoria colectiva da veciñanza.
Como mostra de respecto, agradecemento e recoñecemento á súa figura e á súa obra, o Concello de Cariño decretou tres días de loito oficial. Durante este período, as bandeiras do municipio ondearán a medio mastro en sinal de duelo e respecto.
Así mesmo, decidiuse suspender todos os actos organizados polo Concello de Cariño na Romaría de San Xiao do Trebo, prevista para mañá, sábado 31.
O Concello de Cariño quere trasladar o seu máis sincero pésame e un forte abrazo á familia de don Paco, ás súas amizades e a toda a comunidade parroquial, acompañándoos nestes momentos de dor.
