O alumnado dos colexios da cidade poderá facer rutas e actividades nas prazas de abastos municipais para coñecer desde dentro o funcionamento e degustar os produtos locais
O Concello ofrecerá, ao longo dos dous próximos cursos escolares, novas sesións para escolares do programa “Visita o teu mercado”, que lle achega os produtos locais e o funcionamento das prazas de abastos ao alumnado do último curso de infantil (5 anos) e do primeiro e segundo ciclo de primaria (1.º, 2.º, 3.º e 4.º).
O proxecto, que está actualmente en fase de licitación, consistirá na realización dun máximo de 70 visitas gratuitas durante os períodos escolares de 2026 e 2027, aínda que a cifra final dependerá das solicitudes de participación enviadas polos centros educativos.
As sesións levaranse a cabo nos mercados de Santo Agostiño, Eusebio da Guarda, Elviña, Monte Alto e Durmideiras, e incluirán actividades como:
– Percorrido polos diferentes pavillóns, onde se realizarán actividades lúdicas eprácticas adaptadas á idade do alumnado
– Participación en obradoiros didácticos
– Degustación dun aperitivo con produtos do mercado e un batido de froitas natural
– Entrega de premios e sorteos
O obxectivo deste tipo de iniciativas é, ademais de darlle a coñecer o funcionamento dos mercados municipais á mocidade, divulgar un estilo de alimentación equilibrado e saudable, con produtos autóctonos de primeira calidade e receitas sinxelas e atractivas para todas as idades. A medida enmárcase dentro das accións postas en marcha polo Goberno de Inés Rey tanto para o fomento do pequeno comercio como para a promoción de estilos de vida saudables.
