– O pleno da corporación aprobou a pasada noite unha partida de 2,7 millóns para o plan de mellora dos camiños municipais, malia o voto en contra do BNG. Tamén saíu adiante a proposta do goberno local para transformar a contorna do CEIP Porto Cabeiro, cun investimento de 401.700 euros, e a reforma do campo municipal da Gándara, no Viso, por importe de 469.000 euros.
– Os votos negativos dos grupos municipais de PP e BNG impediron sacar adiante o proxecto do novo Museo Municipal destinado a albergar a obra de Ángel Barros. A alcaldesa, Digna Rivas, lamenta “a falta de compromiso” dos grupos da oposición coa cultura e o patrimonio redondelán que complica a posta en marcha do primeiro museo de Redondela.
O pleno da corporación aprobou onte tres importantes propostas do goberno local, cun investimento total de 3,6 millóns de euros. O proxecto máis ambicioso é o plan de mellora e renovación de 68 camiños municipais de todas as parroquias, cunha partida de 2.759.339. Este programa de actuación aprobouse cos votos do PSdG-PSOE, AER e PP, malia o voto en contra do BNG. A alcaldesa, Digna Rivas, agradeceu o apoio dos populares neste punto, xa que se trata dunha inversión “extraordinaria” que responde ás necesidades de cada unha das parroquias “especialmente en materia de accesibilidade, seguridade viaria e cohesión territorial”. O concelleiro de Infraestruturas e Sostibilidade, Roberto Villar, lembra que as obras que recolle este plan “foron aprobadas por unanimidade en todos os Consellos Parroquiais e responden as demandas dos propios representantes veciñais”.
Na sesión celebrada a pasada noite tamén se aprobou, neste caso por unanimidade, a transformación do entorno do CEIP Porto Cabeiro. A reforma deste espazo, de case 3.0000 m² , será unha gran mellora para os barrios de Porto Cabeiro e A Millarada. Rivas explica que o obxectivo prioritario é “transformar un espazo actualmente dominado polos vehículos nun hábitat saudable, inclusivo e, sobre todo, seguro para a infancia”.
A reforma integral do campo de fútbol municipal da Gándara, no Viso, aprobouse cos votos do PSdG-PSOE, AER e PP, e coa abstención do BNG. A remodelación do campo incluirá unha nova base con asfaltado, o cambio do céspede e melloras na drenaxe e o rego. Rivas explica que o proxecto orixinal presentaba “importantes eivas na base do terreo de xogo, que agora deben emendarse”. O investimento , de 469.280 euros, asegura a viabilidade das instalacións cun estado óptimo “tanto agora como no futuro”.
A oposición lastra o futuro museo municipal de Redondela. Os votos negativos dos grupos municipais de PP e BNG impediron sacar adiante o proxecto do novo Museo Municipal destinado a albergar a obra de Ángel Barros. A alcaldesa, Digna Rivas, lamenta “a falta de compromiso” dos grupos da oposición coa cultura e o patrimonio redondelán que complica a posta en marcha do primeiro museo de Redondela. Esta agardada instalacións está incluída no PAI (Plan de Acción Integral) e conta con financiamento de Fondos Europeos. O novo edificio está proxectado no espazo das coñecidas como “vivendas dos mentres”, na avenida Mendiño. A rehabilitación do edificio e a súa musealización ascenden a 1.167.000 euros, dos que os Fondos Europeos cobren o 60%, e a cantidade restante, 466.800 euros, deben ser financiados polo Concello. A alcaldesa advirte que BNG e PP “tumbaron a oportunidade de facer o museo municipal que os colectivos culturais levan años solicitando, unha infraestrutura importante para a cultura e a arte que Redondela merece”.
O goberno de Rivas presentaba no pleno de febreiro investimentos por un valor superior aos 4 millóns de euros, a financiar con fondos propios procedentes do remanente de Tesourería, que ascende a 5,6 millóns. Finalmente aprobáronse tres das catro propostas, por un importe total de 3.630.319 euros.
