Medio ano perdido. Moita venda de fume
Hoxe, 10 de marzo, cúmprense 6 meses da moción de censura que perturbou con malas mañas o resultado democrático das elecións municipais en Carral, impedindo gobernar ao equipo de Javier Gestal. O balance deste medio ano de goberno impostor do Partido Popular supuxo o que xa prognosticábamos desde Alternativa dos Veciños: parálise total, ralentización administrativa e moita palabrería apoiada no tradicional caciquismo do PP.
O único balance posible que poden realizar son algunhas obras xa contratadas pola Alternativa, pero que aínda non remataron como as cunetas de Balbén en San Vicente de Vigo; o ximnasio, as cunetas de Tabeaio, Vista Real (Cañás), A Ribeira e Suavila. Tamén están sen resolver outras obras que lles quedaron encamiñadas, como as de Montecelo, Cimadevila ou Rúa Fraga.
O proxecto de saneamento de Cañás nas zonas de Casanova e Vistarreal quedou metido nun caixón; outros na mesma parroquia xa estaban adxudicados e contratados para poder facerse no 2025, encamiñados os de outras parroquias como Beira, Canedo, Quembre… só parece que será posible o de Gosende grazas ás xestións que Alternativa dos Veciños deixou feitas antes de ser desposuída da alcaldía.
Varios pregos de contratación que o equipo de Gestal deixou en estado avanzado, tras estes seis meses, non son realidade. Afectan a servizos tan importantes como limpeza, xardinería, climatización, redacción de proxectos, servizos de auga… Tamén paralizada quedou a mellora do campo de fútbol dos Capelos, que se podía ter feito con remanentes de tesourería e quedou tamén vítima da desidia.
Outro importante avance que paralizaron foi a ordenanza de servizos sociais, que quedou praticamente lista e aínda non aprobaron. Estímase que nestes seis meses, o actual Goberno perdeu uns 300.000 euros en subvencións pola desidia de non solicitalas.
No capítulo que si aproba o novo Goberno golpista é o de vender fume: un novo centro de saúde (que non se construirá en Carral), unha residencia da terceira idade que só existe nas declaracións de intencións e para a renovación da depuradora só fotos e ningún feito.
Os poucos avances que levou adiante o Goberno do PP máis os concelleiros tránsfugas elixidos, foron realizadas polo equipo de Gestal antes de ser impropiamente expulsado da alcaldía: campamentos de verán e nadal, actividades escolares, madrugadores, subvencións para asociacións culturais, deportivas e festivas; eventos como Tapea Carral, Entroido, promoción comercial, cabalgada de Reis… ademais de subvencións para excursións de alumnado, talleres de memoria, mellora da pista de tenis, campamentos, etc.
