Máis de 3.000 persoas participaron nas distintas probas da Carreira Popular da Torre de Hércules, que contou cunha andaina conmemorativa do 8-M
Yago García e Noa Mirantes convertíronse esta tarde nos primeiros corredores en gañar a proba absoluta da primeira carreira do circuíto de carreiras nos barrios Coruña Corre 2026. A Carreira Popular da Torre de Hércules, celebrada este sábado en horario nocturno, como é habitual, congregou a máis de 3.000 persoas nas súas distintas categorías.
Ademais de Yago García, na categoría masculina tamén se subiron ao podio Jorge Sieira e Jan Skarban. Na categoría feminina, tras Noa Mirantes chegaron á meta Sara López como segunda clasificada e Inés Papín como terceira.
A alcaldesa, Inés Rey, asistiu as primeiras probas da xornada, as correspondentes ás categorías inferiores, acompañada polo concelleiro de Deportes, Manuel Vázquez. “O circuíto Coruña Corre é un referente entre as carreiras populares do país e unha proba de que na cidade prima o ocio saudable e a práctica de deporte, sumando ano a ano máis adeptos de todas as idades”, indicou Rey.
A carreira da Torre contou cun percorrido de 6,3 quilómetros a través de Durmideiras, San Amaro, os Pelamios, as Ánimas e, de novo, volta polo mesmo treito do Paseo Marítimo, bordeando a enseada e o paseo dos Menhires, para enfilar a recta final pola costa da Torre.
Poucos minutos despois da carreira absoluta foi o turno da andaina polo 8-M, que contou cun percorrido lixeiramente máis curto, de case cinco quilómetros.
