O alcalde Gonzalo Jácome destaca que “o seu paso pola presidencia da CEO non foi só un fito local, foi unha mensaxe a toda España”
A Sala Valente acolleu esta tarde o acto de entrega do XX Premio Clara Campoamor á Igualdade de Oportunidades, que outorga o Concello de Ourense no marco das actividades de celebración do 8-M, Día Internacional das Mulleres. O xurado, reunido o día 3 de febreiro, acordou conceder o premio, a título póstumo, á empresaria e avogada ourensá Marisol Nóvoa Rodríguez.
O recoñecemento destaca a súa figura como un “exemplo de compromiso, solvencia profesional e vocación de servizo público desde o tecido empresarial”. Tamén salienta a súa contribución “decisiva á normalización da presenza feminina en órganos de dirección ocupados tradicionalmente por homes”.
O acto contou coa asistencia do alcalde de Ourense, Gonzalo Pérez Jácome, e a concelleira de Igualdade, Noa Rouco, entre outros representantes da Corporación municipal, e da familia de Marisol Nóvoa. A súa sobriña, Lara Ferradás Nóvoa, recolleu o premio das mans do alcalde, que destacou que “o seu paso pola presidencia da Confederación Empresarial de Ourense (CEO) non foi só un fito local. Foi unha mensaxe a toda España. Marisol foi das primeiras mulleres no noso país en pórse á fronte dunha organización empresarial, demostrando que o liderado non entende de xéneros senón de capacidade e de visión”.
