Programará tres charlas no mes de xuño sobre dereitos do consumidor
Neda será escenario en xuño do programa autonómico “Consumo en ruta”. Unha iniciativa que, a través de accións formativas e de resolución de dúbidas, busca favorecer que a veciñanza se familiarice co seus dereitos como consumidores e coñeza o labor do Instituto Galego do Consumo. O vindeiro luns, terá lugar a primeira das charlas.
A petición do Concello de Neda, ofertaranse no municipio as tres sesións temáticas, de unha hora de duración, que compoñen o ciclo. Así, a Casa das palmeiras acollerá o 2 de xuño, a partir das 19 horas, a charla participativa que leva por título “Coñece e defende os teus dereitos como consumidor”. O día 9, no mesmo lugar e hora, programarase a destinada a informar sobre os dereitos básicos na subministración do fogar, e o 16, a relativa aos servizos financeiros e bancario.
As persoas participantes poderán formular durante as xornadas as dúbidas que consideren oportunas en materia de consumo, teñan ou non relación coa correspondente sesión formativa.
A participación neste programa da Xunta permitirá aos nedenses saber un pouco máis sobre os seus dereitos como consumidores e coñecer as ferramentas que, a nivel autonómico, teñen á súa disposición para asesorarlle, acompañarlle e, en último caso, axudarlle a restituír os seus dereitos.
