Aprobada unha moción do Grupo Popular que amosa o “absoluto apoio” da Deputación á candidatura da cidade de Vigo e pide á RFEF que faga públicos os criterios de baremación
Na sesión aprobouse unha modificación de crédito por valor de 4,2 millóns que inclúe axudas a entidades de todos os ámbitos por valor de máis de 350.000€, obras en edificios da Deputación por máis de 1M€ e a 400.000€ para a Bienal de Pontevedra
O pleno aprobouse a execución da sentenza para incluír ao Concello do Porriño como beneficiario do programa ReacPon, do que fora excluído, así como a dotación dos fondos para executar o proxecto (645.000€) incluída na modificación de crédito
A Deputación de Pontevedra aprobou este venres, na sesión plenaria ordinaria correspondente ao mes de marzo, unha moción presentada polo Grupo Popular para amosar o apoio da Deputación á candidatura da cidade de Vigo para converter o estadio de Balaídos en sede do Mundial de fútbol do 2030, esixir á RFEF que faga públicos os criterios de baremación e as puntuacións técnicas de todas as cidades que aspiraban a acoller partidos da fase final desta competición e demandar o establecemento de conversacións directas e un traballo técnico rigoroso entre o Concello e a RFEF para abordar o procedemento levado a cabo para a designación das sedes co obxectivo de esclarecer os feitos. Á hora de votar esta proposta, presentada polo procedemento de urxencia, os grupos do PSOE e BNG rexeitaron participar no debate e votación, e abandonaron o salón de plenos.
Durante a sesión, tamén se votou unha modificación de crédito por valor de 4,2 millóns de euros que servirán para executar obras de mellora en centros de titularidade da Deputación, a posta en marcha dun novo curso de SmartPeme, acatar unha sentenza favorable ao Concello do Porriño relacionada co programa ReacPon do ano 2021 e repartir subvencións a distintas entidades do ámbito social, cultural, científico, deportivo ou empresarial que prestan servizo na provincia. Así mesmo, a sesión serviu para a aprobación por unanimidade da modificación dos proxectos do PON2030 dos concellos de Nigrán e Tui, así como o proxecto definitivo para o ensanche e mellora da seguridade viaria da EP-2702 entre Amoedo e Os Valos, no termo municipal de Pazos de Borbén. Do mesmo xeito, saíron adiante dúas mocións presentada polo Grupo Popular para pedir ao Goberno da dragaxe do río Miño e a saldar a débeda do Goberno con Galicia no sistema de dependencia.
O pleno comezou coa lectura dun discurso a cargo dun voceiro da veciñanza de Bueu que reclaman unha mellora na contorna de Cabo Udra, que o presidente Luis López xa adiantara hai unha semana ao alcalde Félix Juncal que executará este mesmo ano. A sesión continuou coa aprobación, cos votos a favor do Grupo Popular e a abstención dos grupos socialistas e nacionalistas, do expediente de modificación de crédito, a segunda do ano, por un importe total de 4,2 millóns de euros que se financia con cargo a remanentes líquidos de tesourería. Este acordo serve para poñer en marcha investimentos que se destinarán, entre outros fins, á posta en marcha dun novo programa Smart Peme (1,1M€), á mellora de centros de titularidade da Deputación como o Centro Vacacional da Lanzada (150.000€), Príncipe Felipe (168.800€), Santa Clara (360.000€), Palacete das Mendoza (98.000€) e outras intervencións en dependencias provinciais (323.000€). Outro dos piares que sustentan esta modificación de crédito está na concesión de subvencións a entidades de todos os ámbitos que prestan servizo na provincia, é o caso de: Cámaras de Comercio (25.000€), Pont-Up Store (15.000€), Protección Civil (100.000€), Fundación Banco de Alimentos (10.000€), Universidade de Vigo (55.000€ a través de dous proxectos), UNED (40.000€), axudas a deportistas de alto nivel (130.000€) ou ampliación dos fondos do programa +Talento Motor 2025 (12.000€). Así mesmo o Museo de Pontevedra recibe tamén unha inxección de 400.000 euros para a organización da Bienal de Arte de Pontevedra.
Esta modificación de crédito achega tamén os fondos necesarios para a execución do proxecto de Humanización da rúa Antonio Palacios, no Concello de O Porriño, valorado en 645.000 euros. Con respecto a este asunto, o pleno aprobou por unanimidade executar a sentenza do TSXG para incluír este proxecto entre os beneficiarios do programa ReacPon, do que fora excluído no ano 2021 e que posteriormente a Xustiza lle deu a razón.
Dragaxe do Miño e mellora do sistema de dependencia
No apartado de mocións, tamén foi aprobada co apoio do grupo de goberno e do BNG a moción para reclamar ao Goberno de España o pago da débeda histórica do Sistema de Atención á Dependencia en base ao recollido na lei deste ámbito, aprobada no ano 2006, e que ascende a 2.500 millóns de euros para a Comunidade de Galicia, dos que 771 millóns corresponden á provincia de Pontevedra, esixir ao Goberno que cumpra co financiamento do sistema e que cese de inmediato nos recortes ás achegas de Galicia para sufragalo tras diminuílas en máis de cinco puntos porcentuais nos anos 2023 e 2024. Igualmente aprobouse a petición do Grupo Popular para solicitar ao Goberno central a dragaxe do Río Miño ao seu paso polos concellos da provincia. Pola contra, foi rexeitada a petición do PSOE para instar á xunta á gratuidade do aparcamento do futuro Hospital Gran Montecelo.
Outros asuntos da orde do día que saíron adiante foron a modificación dos pregos reguladores do procedemento aberto para a adxudicación do servizo de seguridade e vixianza nos centros da Deputación e o reinicio do prazo de licitación, a modificación do cadro de persoal do Consorcio Provincial de Pontevedra para a prestación do servizo contra incendios e salvamento e a creación do posto de director ou directora de Turismo.
Streaming
Durante a celebración do pleno ordinario correspondente ao mes de marzo, o sistema de retransmisión en liña dos plenos sufriu un problema técnico que provou a caída da emisión. Con todo, a sesión completa está dispoñible para o seu visionado desta ligazón.
