Tamén finalizaron os traballos na área de xogos do CEIP María Pita, no barrio de Elviña, onde se substituíu a antiga superficie de céspede artificial por un novo firme de caucho
O Concello reabriu esta semana o parque infantil da praza Mestre Mateo, unha instalación situada entre o Ensanche e Riazor onde, ao longo deste mes, se executaron diversas melloras orientadas á renovación dos espazos de xogo.
Ademais dos traballos sobre a superficie de caucho, tamén se acometeu a substitución da antiga estrutura de escalada recreativa, certificada estes últimos días como paso previo á súa reapertura para o uso e desfrute das crianzas.
Esta intervención dálle continuidade ao plan de actuacións previsto polo Goberno de Inés Rey nos parques e áreas infantís da cidade, que tamén inclúe os centros educativos. Neste sentido, o Concello rematou tamén as actuacións no espazo de xogo do CEIP María Pita, no barrio de Elviña, onde se mudou o antigo pavimento de céspede artificial por un novo firme de caucho, máis seguro, atendendo ás necesidades e demandas formuladas polo colexio.
A concelleira de Infraestruturas e Mobilidade, Noemí Díaz, subliñou o compromiso do Goberno municipal para modernizar e actualizar os parques infantís da Coruña e lembrou que un dos obxectivos estratéxicos presentados no proxecto dos Orzamentos municipais 2025 é a posta en marcha dun plan a curto e medio prazo que recolle un investimento de oito millóns para mellorar os parques infantís actuais, crear outros novos e construír dúas áreas de xogo cubertas ao longo deste mandato.
“Tal e como subliñou a alcaldesa, Inés Rey, temos o compromiso de facilitar que todas as familias teñan, como mínimo, un parque infantil a dez minutos da súa vivenda”, explicou Díaz.
