A mostra está organizada polo Concello no marco da programación do Entroido de Ourense 2025 e estará aberta ao público até o día 16 de marzo
A Sala municipal Valente acolle desde hoxe até o día 16 de marzo a exposición Personaxes de Entroido Galego e Mascarados de Portugal, de Carlos Padín, organizada polo Concello dentro da programación do Entroido de Ourense 2025. A mostra, que se inaugurará hoxe ás 19.30 horas, está formada por 146 obras pictóricas de tamaño medio nas que o pintor vigués Carlos Padín fai un percorrido polos personaxes protagonistas dos entroidos de Ourense, Galicia e parte de Portugal.
Carlos Padín representa un Entroido cheo de luz, colorido e festividade nas rúas. Pon en valor o Entroido como a festa máis auténtica, popular e participativa, amósanos os seus costumes e agudiza o humor como elemento característico desta celebración de longa tradición popular.
A mostra pódese visitar na Sala Valente, na rúa do Paseo, de martes a sábados, de 11.00 a 13.00 e de 18.30 a 21.30 horas, e os domingos de 11.00 a 13.00 horas.
