Cada un destes clubs, de todo tipo de disciplinas deportivas recibe un máximo de 3.000 euros para financiar diferentes gastos
O presidente da Deputación de Pontevedra, Luis López, confirmou que a Xunta de Goberno da institución provincial deu luz verde ao reparto de 335.000 euros entre 301 clubs deportivos de 23 concellos da zona de Vigo e o sur da provincia que participan en competicións federadas de ámbito inferior ao estatal. “Somos a provincia do deporte, e para seguir séndoo temos a obriga de apoiar aos noso deportistas e clubs, que levan con orgullo o nome da nosa provincia alá onde compiten”, asegurou López.
Cada un destes clubs recibe un máximo de 3.000 euros e son de todo tipo de disciplinas deportivas: fútbol, balonmán, ciclismo, padel, rugby, artes marciais, atletismo, montañismo, caza, esgrima, boxeo ou, entre outros, patinaxe. As axudas permitiranlle sufragar gastos federativos, de competición e adestramento, de persoal, de material deportivo ou gastos sanitarios. En total, no conxunto da provincia distribuíronse un total de 600.000 euros.
No que respecta á comarca de Vigo e ás comarcas do sur da provincia, dous clubs da Cañiza reciben 2.304 €, sete da Guarda 7.855 €, tres das Neves 2.756 €, sete de Baiona 7.645 €, tres de Covelo 2.319 €, un de Crecente 859 €, dous de Fornelos de Montes 1.302 €, 19 de Gondomar 15.802 €, dous de Mondariz 2.580 €, 12 de Mos 11.636 €, outros 12 de Nigrán 9.679 €, sete do Porriño 8.691 €, cinco do Rosal 5.786 €, tres de Oia 1.861 €, un de Pazos de Borbén 517 €, 16 de Ponteareas 18.941 €, 19 de Redondela 24.993 €, 11 de Salceda de Caselas 13.177 €, oito de Salvaterra de Miño 7.552 €, nove de Soutomaior 9.568 €, seis de Tomiño 5.294 €, 14 de Tui 19.216 € e 132 de Vigo 155.319 €.
