Xoán Reices: “o concello acaba de recibir unha nova multa de 8.000 euros, que no que vai de ano suma un total de 23.000 euros, uns cartos que saen do peto de todos os veciños e veciñas da Estrada”
O concello da Estrada leva meses amoreando multas de Augas de Galicia polos continuos vertidos dos sumidoiros a ríos e regatos. Segundo explicou o concelleiro do BNG, Xoán Reices, “o concello acaba de recibir unha nova multa de 8.000 euros, que no que vai de ano suma un total de 23.000 euros, uns cartos que saen do peto de todos os veciños e veciñas da Estrada”.
“Hai que atallar o problema para acabar cos vertidos contaminantes á rede fluvial e con esta sangría para as arcas municipais”, afirma Reices, “é un absoluto despropósito que o alcalde siga pagando multas cos cartos de todos e todas, sen importarlle o máis mínimo”.
O concelleiro do BNG explica que “en reiteradas ocasións avisamos dos problemas das arquetas dos sumidoiros preto da praia fluvial e en xeral en toda a rede de sumidoiros da vila, que periodicamente bota por fóra todo tipo de desperdicios”. “Sen embargo”, explicar Reices, “a resposta do goberno municipal do PP foron boas palabras e a pesar de recoñecer o problema non se tomaron medidas para atallar estes vertidos, que non só contaminan, senón que supón un goteo de continuo de cartos públicos para pagar as multas”.
O PP ten que centrarse nos problemas reais
Xoán Reices afirma que “o PP está instalado desde hai tempo en políticas efectistas para a galería, porque sabe que iso élle rendíbel electoralmente, mentres descoida os problemas reais dos veciños e veciñas. Así é que máis do 80% das parroquias do rural están sen saneamento, e así é que tamén son habituais as multas de Augas de Galicia polos vertidos da EDAR ao río. Está claro que ao alcalde non lle doen o cartos das multas, xa que pagamos entre todos e todas, pero tampouco a saúde dos veciños e veciñas, nin o medio ambiente”.
“O alcalde ten que centrarse nos problemas reais que teñen os veciños e veciñas”, afirma Reices, “pasar de todo, sáenos moi caro”. “Po iso”, engade o concelleiro do BNG, “instamos ao Sr. Louzao a tomar medidas para atallar este grave problema medio ambiental, que colateralmente repercute no peto de todos os veciños e veciñas”.
