Augas de Galicia levará a cabo as actuacións en dous tramos distintos do río Caraña ao seu paso por estes dous municipios e tamén nos ríos: Infesta, Pasatempo, Angustias e Mendo, no seu percorrido polo termo de Betanzos
A Consellería de Infraestruturas e Mobilidade, a través de Augas de Galicia, está a desenvolver traballos de conservación e limpeza nos treitos interurbanos de 5 ríos ao seu paso polos concellos de Betanzos e de Paderne.
Concretamente Augas de Galicia leva a cabo traballos en dous tramos distintos do río Caraña ao seu paso polos dous concellos e tamén nos ríos Infesta, Pasatempo, Angustias e
Mendo, neste caso no seu percorrido polo municipio de Betanzos.
As tarefas estanse a desenvolver en distintos tramos interurbanos destes ríos, que coinciden
co seu percorrido por distintas parroquias destes municipios.
Estes labores forman parte das intervencións de mantemento que leva a cabo Augas de Galicia nas áreas con risco potencial significativo de inundación (Arpsi).
As actuacións céntranse na retirada de árbores e pólas caídas e madeira morta, así como a
roza selectiva, limitada ao ancho da canle, en tramos cubertos por maleza. Unha vez
finalizadas estas actuacións, os ríos quedarán despexados de maleza, posibilitando así a
circulación fluída das súas augas.
Estas accións enmárcanse no programa de mantemento, conservación e mellora que realiza
Augas de Galicia no dominio público hidráulico das bacías de Galicia-Costa, no ámbito
territorial da zona Galicia-norte.
A Consellería de Infraestruturas e Mobilidade mantén activas as actuacións para a mellora
dos leitos fluviais e para favorecer as condicións naturais do ecosistema dos ríos.
