Os vehículos foron cedidos aos municipios coruñeses de Ames, Betanzos, Muxía e As Pontes
Estes catro municipios foron beneficiarios deste material, no marco da orde de axudas para equipamentos de emerxencias, na que a Xunta investiu 932.400 euros o ano pasado para reforzar os recursos das agrupacións de 87 concellos e 2 mancomunidades
O A Xunta entregou hoxe 4 vehículos UTV (Utility Task Vehicle) ás Agrupacións de Voluntarios de Protección Civil (AVPC) dos concellos coruñeses de Ames, Betanzos, Muxía e As Pontes.
Estes 4 vehículos inclúese no material cedido ás AVPC de concellos de menos de 5.000 habitantes no marco da orde de axudas para equipamentos de emerxencias na que o Goberno galego investiu 932.400 euros o ano pasado. Xunto con estes 4 UTVs, 87 concellos galegos e 2 mancomunidades recibiron 12 remolques equipados para intervir en incidencias como temporais ou inundacións, 37 tendas de campaña habilitadas para ser despregadas en situacións de emerxencias, así como 8 vehículos pick-up, 4 embarcacións pneumáticas de salvamento e rescate, 12 coitelas para a retirada de neve e 12 esparexedores de sal.
Os vehículos UTV con clasificación T1b entregados hoxe contribúen a mellorar o servizo de Protección Civil en emerxencias debido a súa versatilidade para adaptarse aos desprazamentos en calquera terreo, o que permite chegar a zonas de difícil acceso. Trátase de cuadriciclos de tracción 4×4 e, a diferencia dos quads, con volante e con capacidade para transportar carga. Os concellos que optaron para ser beneficiarios destes vehículos ou ben están adscritos ao Plan de Salvamento de Praias de Galicia ou contan con algún tramo do Camiño de Santiago polo seu territorio.
A Xunta mantén deste xeito o seu compromiso cos servizos de emerxencia das entidades locais, co obxectivo de garantir a seguridade dos seus efectivos coa dotación do equipamento necesario para traballar nas mellores condicións e mellorar a efectividade e o tempo de resposta nas súas intervencións. O director xeral de Emerxencias e Interior destacou o labor altruísta que realizan os voluntarios das AVPC no seu día a día para velar pola seguridade dos cidadáns.
A través destas e outras axudas o Goberno galego realizou un importante esforzo nos últimos anos para reforzar os medios de emerxencias dos concellos e leva investidos máis de 14 millóns de euros en material cedido aos municipios galegos. A Xunta completa o apoio aos servizos de emerxencias coa formación neste eido impartida na Academia Galega de Seguridade Pública (AGASP).
