- A proposta céntrase na construción dunha Variante que unirá a N-640 coa N-550 e que permitirá sacar do casco urbano de Caldas de Reis gran parte do tráfico que hoxe atravesa a vila
- O Ministerio de Transportes avanza na tramitación do estudo informativo para desenvolver este novo trazado máis viable técnica e ambientalmente, que terá un orzamento estimado de 12 millóns
- O delegado destaca o papel do alcalde, Jacobo Pérez, na defensa das demandas veciñais e na busca de solucións desde o diálogo
- “O Goberno está ao carón de Caldas de Reis para darlle solución a un problema histórico”
O delegado do Goberno en Galicia, Pedro Blanco, acordou co alcalde de Caldas de Reis, Jacobo Pérez, o impulso dunha nova alternativa á Variante Oeste que permitirá mellorar a mobilidade no municipio e resolver os problemas de tráfico “de paso” polo casco urbano cunha menor afección territorial. Esta proposta foi analizada nunha reunión de traballo na que se confirmou que esta alternativa xa avanza coa tramitación do estudo informativo, co obxectivo de desenvolver unha solución máis viable tanto desde o punto de vista técnico como ambiental.
A proposta na que traballa o Ministerio céntrase na construción dun vial de conexión a modo de Variante que unirá a N-640 coa N-550, que permitirá sacar do casco urbano de Caldas de Reis gran parte do tráfico que hoxe atravesa a vila. Esta actuación, máis axustada que o proxecto inicial, permitiría dar resposta á problemática principal cun investimento estimado de arredor de 12 millóns de euros.
A alternativa proposta resulta viable ao evitar afeccións significativas ao territorio e ao adaptarse ás condicións ambientais e hidráulicas da zona, a diferenza doutras opcións que foron descartadas. O trazado previsto contempla a conexión entre ambas vías mediante unha infraestrutura que garante a funcionalidade necesaria para desviar o tráfico, especialmente o pesado, que se dirixe cara á AP-9 e ao porto de Vilagarcía de Arousa.
Durante a reunión, Pedro Blanco destacou a implicación e o traballo do alcalde de Caldas de Reis, Jacobo Pérez, que foi clave á hora de canalizar as demandas da veciñanza, trasladar propostas e contribuír á definición dunha alternativa viable. O delegado puxo en valor a súa actitude de diálogo constante e colaboración institucional para avanzar nunha solución compartida.
O delegado subliñou que o Goberno “está ao carón de Caldas de Reis para dar unha solución a un problema histórico”, apostando por unha actuación que mellore a mobilidade e a seguridade viaria sen provocar grandes afeccións no territorio, en coordinación co Concello e atendendo ás necesidades da veciñanza.
