A planificación contempla unha ampla marxe de capacidade de camas, mantendo utilizables 64 camas máis das que se prevé necesitar no CHUP e 26 camas máis das que se prevé necesitar no Hospital do Salnés
No caso de que o nivel de ocupación hospitalaria superara o 90%, un sistema de continxencia dotará de persoal específico para utilizar o número camas necesarias, garantindo a asistencia de continuidade en todo momento
A área sanitaria de Pontevedra e O Salnés manterá durante o vindeiro verán a dispoñibilidade do 100% das camas nos seus respectivos hospitais para dar resposta asistencial a calquera necesidade. O Plan de Adecuación de recursos asistenciais programado para a etapa estival na Área Sanitaria de Pontevedra e O Salnés prevé a utilización dun 89 % das súas camas de hospitalización.
Dita planificación -realizada en base ao estudo pormenorizado da afluencia de pacientes durante esta época e que se leva a cabo e replanifica cada ano- permite asegurar as necesidades de cobertura asistencial dacordo coa previsión de demanda na área sanitaria de Pontevedra e O Salnés, así como executar un uso racional dos recursos.
Tomando como referencia o nivel de ocupación de camas rexistrado o verán dos pasados anos 2020 e 2019 -que acadou no Complexo Hospitalario Universitario de Pontevedra un 76% (456 camas) e no Hospital do Salnés un 68% (82 camas)- a Área Sanitaria de Pontevedra e o Salnés mantéra este ano operativas no Complexo Hospitalario Universitario de Pontevedra 520 das súas camas -o 87% do total- e no Hospital do Salnés 108 camas -que representan o 90% da súa totalidade-.
Plan de adecuación dos recursos planificado cada verán
Este plan de adecuación dos recursos asistenciais planificado cada verán pola Área Sanitaria xustifícase pola coincidencia do período regulamentario no que a maioría de profesionais do Sistema Sanitario Público galego solicita o desfrute das súas vacacións e tamén pola diminución dos ingresos hospitalarios por procesos repspiratorios, polo que é necesario efectuar unha programación previa, mantendo e adaptando os recursos asistenciais a esta realidade que se repite cada ano durante esta época.
Dito plan de adecuación de recursos tamén posibilita que ao longo dos meses deste verán se executen pequenas obras e actuacións preventivas ou reparadoras en distintas unidades, unhas intervencións que durante unha época de maior ocupación sería máis complicado acometer.
A Área Sanitaria de Pontevedra e o Salnés reitera que estarán dispoñibles a totalidade das camas en todo momento na área, quedando operativas de xeito inmediato cando fora preciso.
Sistema de continxencia específico
Lémbrase que, como medida preventiva no caso de que o nivel de ocupación superara o 90% en calquera dos tres hospitais, a Dirección da Área Sanitaria dispón doutro sistema de continxencia específico que dotará de persoal específico para utilizar aquelas camas que foran precisas, garantindo a asistencia de continuidade en todo momento.
