Haberá ilustracións, acuarela, debuxo realista, arte dixital, manga, cómic, cerámica, xoiería e bixutería artesanal, creacións en 3D pintadas a man ou velas artesanais
O Centro Comercial Gran Vía de Vigo acolle desde este mércores ata o sábado a undécima edición do mercado de arte e creatividade Mona, no que participarán máis de 40 creadores repartidos nos catro días do evento. Celébrase de 11.30 a 14.30 horas e de 16.30 a 20.30 horas na planta cero, xunto ao acceso da rúa Miradoiro.
Os participantes no Mona, que contará con máis de 10 expositores por xornada, ofrecerán ilustracións, acuarela, pintura acrílica e ao óleo, debuxo realista, arte dixital, manga, cómic, cerámica, xoiería e bixutería artesanal, artesanía en madeira, pezas de macramé, téxtil, papelería e deseño gráfico, prints, láminas e pósteres, stickers, creacións en 3D pintadas a man , pezas upcycling e velas artesanais.
A directora do mercado Mona, a ilustradora e deseñadora gráfica Larissa Lyra, tamén impulsora do Vintax Market, asegura que este mercado “naceu para que a creación se cruce contigo sen avisar”. “A arte non ten por que esperar a que o busques; tamén aparece na rutina. Un centro comercial é un lugar polo que pasan miles de persoas cada día; é un espazo cotián onde unha ilustración, unha peza de cerámica ou unha pintura poden sorprender a alguén que simplemente saíra de casa para dar un paseo”, explica.
A organización celebra a gran acollida que tivo a undécima edición do Mona, na que se anotaron 65 persoas nos tres días e medio nos que estivo aberto o formulario de inscrición.
“Animamos á xente para vir ao mercado para coñecer en persoa o talento local de tantos profesionais”, continúa.
As edicións primeira, segunda, cuarta, quinta, sétima, oitava e décima celebráronse no Centro Comercial Gran Vía, un espazo icónico e concorrido, elixido estratexicamente para achegar o talento artístico local a un público diverso e amplo. A terceira edición desenvolveuse na Contedora e a sexta e a novena, na terraza da Póla.
No Mona, cuxa imaxe representativa é o corpo da Mona Lisa cunha cabeza de gaivota, especie característica da costa olívica, veciños e visitantes poderán apreciar a calidade dos artigos que levarán os artistas e falar con eles para resolver dúbidas ou informarse sobre as técnicas de elaboración e retos nos seus procesos.
Na conta de Instagram do mercado, @mona_mercadoarte, pódese profundar no estilo de cada un dos artistas ou colectivos que formarán parte do evento, descubrir algunhas das creacións que expoñerán no Mona, coñecer que día acudirán ao Centro Comercial Gran Vía ou desfrutar de imaxes e vídeos das 10 edicións anteriores.
Celébrase na planta cero entre o mércores e o sábado de 11.30 a 14.30 horas e de 16.30 a 20.30 horas.
