O alcalde e o grupo de goberno bng-psoe, por decisión unilateral, suspenderon a feira dominical sen xustificación
O grupo de goberno BNG-PSOE, sen consultar previamente nin cos vendedores ambulantes, nin cos partidos políticos da oposición (como si o fixeron nalgunha outra ocasión), tomaron a decisión de suspender a feira dominical, “ante el riesgo sanitario de generar grandes
aglomeraciones de público en un momento como este”, cando os datos epidemiolóxicos publicados pola Xunta de Galicia para o Concello de Mondariz (restrición media-baixa) non
indicaban a necesidade de tomar unha medida tan drástica nin para os vendedores ambulantes nin para a economía local.
Como compensación, o Alcalde no comunicado enviado aos ambulantes, indícalles que
“Logicamente estos días serán descontados de los recibos de pago”, medida que non compensa nin de lonxe o dano causado por impedirlles vir vender este domingo, e moito menos compensa aos locais comerciais de Mondariz que se viron afectados pola suspensión da feira.
Alternativa por Mondariz considera que en Mondariz, se se fai unha boa planificación e se poñen os medios necesarios, hai sitio suficiente para albergar a Feira dos Oficios Artesáns e a feira dominical, garantindo o cumprimento das medidas de seguridade fronte a COVID-19; e lamenta a incompetencia e a apatía demostrada por este grupo de goberno BNG-PSOE que a única acción que fixeron foi a más rápida e a máis cómoda para eles: suspender a feira.
Alternativa por Mondariz recórdalle ao Sr. Alcalde e ao seu grupo de goberno que están ao
servizo da veciñanza, que están obrigados a traballar por e para os seus veciños, que teñen
unha feira dominical regulada e que están obrigados a cumprila, que están obrigados a por os medios necesarios para garantir a súa seguridade e a súa realización, e lamenta profundamente as consecuencias económicas derivadas desta decisión.
