Avogou por seguir traballando na mellora das infraestruturas, na formación e na sensibilización para reducir a cifra de accidentes
A conselleira de Vivenda e Planificación de Infraestruturas, María M. Allegue, reafirmou esta mañá en Vigo o compromiso da Xunta coa mellora continua da rede de estradas autonómicas, para que sexan cada vez máis seguras e ter un territorio máis vertebrado. Fíxoo na conmemoración do Día Mundial no Recordo das Vítimas da Violencia Varia, que tivo lugar ante o monumento no seu recordo no Balcón de Aragón.
Na súa intervención, Allegue sinalou que a xornada de hoxe debe servir tamén para reflexionar sobre o que se pode seguir facendo para reducir a cifra de accidentes, xa que “a única cifra positiva neste sentido é cero”. Ao respecto, apuntou que, con este obxectivo, desde a Xunta actúase en todos os ámbitos: na mellora de infraestruturas, na promoción da educación e da formación e na posta en marcha de campañas de sensibilización.
Ademais, a conselleira manifestou que o Goberno galego aborda este compromiso coa seguridade da rede viaria a través da colaboración cos colectivos e entidades implicados neste ámbito, como é o caso de Stop Accidentes; da planificación e do investimento. Neste sentido, lembrou que o orzamento de 2027 destina unha cifra récord de case 75 millóns de euros á conservación e mellora, un 4% máis que este ano.
Por último, Allegue puxo varios exemplos de intervencións en estradas autonómicas ao seu paso por Vigo para mellorar a mobilidade e seguridade de todos os usuarios: condutores, motoristas, ciclistas e peóns.
Homenaxe en Poio
Pola súa banda, a directora da Axencia Galega de Infraestruturas (AXI), María Deza, asistiu ao acto que con motivo desta efeméride tivo lugar en Poio, diante da escultura o ‘Arpa do Silencio’ de Lito Barreiro, inaugurada o ano pasado en homenaxe ás vítimas de tráfico.

