A entidade crediticia comprométese tamén a manter operativo un caixeiro automático de última xeración con todas as súas funcións activadas e un sistema operativo intiuitivo de fácil manexo para persoas maiores e os menos familiarizados coa tecnoloxía.
Campo Lameiro terá servizos bancarios de ABANCA tres días á semana (martes, mércores e xoves e os 4 e 20 de cada mes coincidindo cos días de Feira) cunha unidade bancaria móbil, ademais dun Caixeiro Automático de última xeración con todas as súas funcións activadas e un sistema operativo de fácil manexo para persoas maiores e os menos familiarizados coa tecnoloxía, segundo confirmaron esta mañá ao alcalde, Carlos Costa, directivos Territoriais da Entidade.
A recuperación destes servizos farase de maneira gradual e así o venres 24 de setembro entrará en funcionamento o novo Caixeiro Automático de última xeración con todas as aplicacións activadas, o 5 de outubro comezará a operar a Unidade Móbil Bancaria e a atención ás feiras terá lugar a partir do mes de novembro.
ABANCA garante que este novo servizo presencial en Campo Lameiro terá un carácter indefinido no tempo e prestarase 3 días á semana e os días 4 e 20 de cada mes. O horario de atención ao público será de 9 a 14 horas de maneira ininterrompida os martes e os xoves e os mércores será pola tarde de 17 a 19 horas. Os días de Feira será pola mañá, de 9 a 14 horas.
Así, coa unidade bancaria móbil e o Caixeiro, os veciños de Campo Lameiro teñen á súa disposición un servizo que permite realizar de forma cómoda e segura as operacións máis necesarias e frecuentes na operatoria diaria: retirada e ingreso de efectivo, pago de recibos e impostos con tarxeta ou caderno, transferencias e traspasos, solicitude de movementos, etc.
O Caixeiro de Campo Lameiro será mellorado cun menú que facilita o seu uso polas persoas maiores e polos menos familiarizados coa tecnoloxía. Ademais, durante as primeiras semanas ABANCA reforza o servizo de apoio cunha persoa para facilitar o seu uso para todas as persoas que o necesiten. Nesta tarefa contará co valioso apoio do Concello.
