O festival municipal consolídase como unha das grandes citas culturais da cidade cunha ampla participación cidadá e un programa ambicioso de actividades e exposicións
O Viñetas desde o Atlántico pecha a súa semana grande con récord de público en todas as actividades organizadas durante a semana do 11 ao 17 de agosto. Foron máis de 120.000 as persoas que se achegaron á feira, tanto ás distintas exposicións que están por toda a cidade, como ás charlas, obradoiros, concertos e outras actividades do festival. Ademais, algúns dos autores convidados ao evento esgotaron edicións dos seus libros nun Viñetas máis ambicioso que en anos anteriores no que tamén houbo máis exposicións e máis autores convidados. As cifras confirman que o novo formato dado por Inés Rey á cita co cómic, consolídase como un referente internacional.
Se pola Rúa da BD pasaron case 80.000 persoas, as varias mostras do Viñetas repartidas por toda a cidade da Coruña non quedaron atrás e acolleron máis de 40.000 visitantes. A de máis afluencia foi a do Quisco Alfonso, que acollía a exposición ‘Viñetas e Decibelios’ con obras de Víctor Coyote, Azagra e Revuelta, Magius, Miguel B. Núñez, Cols (Olivia e Clara Cábez) e Don Rogelio J. Nas 30 horas que estivo aberta durante a semana do festival, máis de 15.000 persoas pasaron polas súas salas.
Tamén houbo unha grande afluencia, maior que anos anteriores, noutras mostras do festival, especialmente as instaladas no Palexco, ‘Quino na Música’, sobre o autor de Mafalda, e ‘Astro-Ratón y Bombillita’, de Fermín Solís.
Ademais, neste espazo houbo unha grande afluencia de público infantil e xuvenil ao concentrarse nel os obradoiros para os máis pequenos do festival. Destacaron tamén as visitas ás mostras de Dave Cooper, na Casa Museo Picasso; a da Sala Municipal de María Pita, con obras de Inacio e Iván Suárez e as gañadoras dos Premios Castelao 2024, Sandra Lordi e Laura Suárez.
A gran novidade deste festival municipal, o photocall 3D instalado no Palexco, tamén foi todo un éxito. Case 3.200 persoas pasaron polo ScanMeNow para ter a súa foto en 3D con Mafalda e Astro Ratón co cartel oficial do festival de fondo.
O Viñetas 2025 tamén destacou pola masiva participación de público nas sinaturas oficiais cos autores. De feito, algúns deles como o Premio Nacional do Cómic, Magius, ou o reputado artista canadiense Dave Cooper, tiveron longas colas na carpa oficial na busca dunha sinatura. Ademais, obras como Black metal, de Magius, ou a biografía de Buenaventura Durruti, de Carlos Azagra e Encarna Revuelta, esgotáronse en todas as librarías do festival.
“Apostamos por un modelo cultural público, participativo e de calidade. Este festival municipal é exemplo da aposta decidida do Concello pola banda deseñada e pola cultura como motor de identidade e dinamización”, destacou o concelleiro de Cultura, Gonzalo Castro. “O apoio do Goberno de Inés Rey é clave para que proxectos coma o Viñetas medren e convertan A Coruña nun referente nacional e internacional”, engadiu.
O festival contou tamén coa colaboración da Asociación Cultural Autobán, colectivo local especializado na autoedición e o fanzine, que organizou dentro da programación oficial o Premio Autobán ao mellor fanzine galego de 2025 e a exposición ExpoFanzines, reforzando a presenza do talento emerxente e do sector profesional da banda deseñada. Xunto ao apoio institucional do Concello da Coruña, o festival contou coa colaboración da Xunta de Galicia, da Deputación da Coruña e do patrocinio de Estrella Galicia.
Acerto coas propostas
A 28ª edición do Viñetas desde o Atlántico destacou pola consolidación dun modelo que combina contidos de calidade, aposta polas novas tecnoloxías e unha programación pensada para todos os públicos. A elevada participación e o ambiente nos diferentes espazos do festival son mostra do bo acerto nas propostas e da capacidade organizativa dun evento que conta cun sólido apoio institucional por parte do Concello da Coruña.
O uso de ferramentas como o photocall 3D, a programación de concertos gráficos, os obradoiros infantís ou o éxito das sinaturas con autores demostran que o festival evoluciona mantendo a súa esencia.
“A Coruña é un fervedoiro autoral que debe mirar cara fóra sen perder a súa identidade, e o Viñetas pode e debe ser a plataforma de lanzamento do noso talento cara ao exterior”, sinalou o director do festival, Manel Cráneo.
Máis pezas e autores
Este Viñetas amosou 1400 pezas entre obra en papel e creación dixital repartida en 21 exposicións. Nesta edición, participaron máis de 70 autores, fronte aos 40 do ano pasado, e preséntanse 20 exposicións, en comparación coas 18 de 2024. Tamén houbo tres concertos de autores de banda deseñada que tamén son músicos, un Late Night Show no Colón e seis obradoiros infantís na Sala Palexco.
Foron preto de 60 actividades entre charlas, faladoiros, talleres ou presentacións e 36 casetas de librarías e editoriais con catro exposicións internacionais con obras de Canadá, Arxentina, Portugal e Francia.
Viñetas show
Este Viñetas 2025 tamén veu cargado de concertos gráficos e actuacións en vivo, incluíndo o espectáculo de Víctor Coyote e o concerto ilustrado de Hombre Tigre, con actuacións de autoras como Anabel Colazo e Raquel Montero. A programación completouse coa proxección do documental Quinografía e un Late Night Show con entrevistas a autores, presentado por Neves Rodríguez.
“Este tipo de formatos achegan o cómic a novos públicos e demostran que a cultura pode ser innovadora, accesible e diversa. Desde o Concello seguiremos apostando por propostas que fagan da Coruña unha referencia na programación cultural contemporánea”, sinalou Gonzalo Castro.
Talleres e espectáculos
Ademais, o Viñetas Mini trouxo talleres diarios con autores convidados na Sala Municipal de Palexco, espectáculos nas Bibliotecas Municipais e a tradicional Rúa da BD, que encheu a feira do cómic coa presenza de 35 editoriais e librarías especializadas, con máis de 100 actividades, entre elas sinaturas, charlas, presentacións, visitas guiadas e masterclasses nos Xardíns de Méndez Núñez. Por suposto, tampouco faltaron os talleres e revisión de portafolios por parte de editores na sección Viñetas Pro.
