A biblioteca acolle este xoves un encontro literario, aberto á veciñanza, con Rober H.L. Cagiao

A biblioteca municipal de Neda organiza este xoves, a partir das 18.30 horas, un encontro entre o escritor Rober H.L. Cagiao e os lectores e lectoras. A iniciativa desenvólvese en paralelo aos clubs de lectura do espazo cultural, cuxos integrantes traballaron durante o pasado mes dous dos títulos máis coñecidos deste autor miñense.
Así, os veciños e veciñas que forman parte destes grupos de lectura mergulláronse nas últimas semanas nas obras que deron nome ás dúas sagas do autor. Por unha banda, a súa primeira novela – El guardián de las flores- coa que gañou o Premio Círculo Rojo á mellor novela de misterio; e por outra, Misterios de Ferrolterra.
López Cagiao (Bañobre, 1976), que se dedica á creación literaria dende o ano 2019, leva publicados xa trece libros. O escritor compartirá conversa cos aquelas cos membros dos clubs e aquelas outras persoas afeccionadas a literatura ou seguidores da súa obra que decidan achegarse á Casa da Cultura nedense. Será unha oportunidade para dialogar co autor sobre a súa obra, e para saber un pouco máis sobre o proceso de creación literaria.