“Ecolóxicos a mares”, unha campaña de colaboración entre o Consello Regulador da Agricultura Ecolóxica de Galicia (Craega) e a Consellería do Mar da Xunta de Galicia, puxo en marcha estes días unha nova iniciativa. A través dun estand itinerante, o estudantado coñeceu e degustou produtos ecolóxicos do mar galego en formato de tapas, descubriu as súas bondades e recibiu folletos informativos e agasallos.
O peche da campaña tivo lugar esta mañá na Facultade de Veterinaria, onde estiveron presentes a conselleira do Mar da Xunta, Marta Villaverde; o delegado territorial da Xunta en Lugo, Javier Arias, e o presidente do Craega, Francisco López Valladares.
Durante unha semana, o estand estivo presente en diferentes facultades de toda Galicia: o martes 18 na Facultade de Informática da Coruña (Campus de Elviña); o mércores 19 no Centro Cultural Universitario de Ferrol; o xoves 20 nos aparcadoiros da Facultade de Comunicación de Pontevedra (Campus A Xunqueira); o venres 21 na Facultade de Ciencias Económicas e Empresariais de Vigo (Campus Lagoas-Marcosende), e o luns 24 na Facultade de Bioloxía de Santiago de Compostela (Campus Sur) e na de Educación e Traballo Social de Ourense.
Durante todo o percorrido do estand, tanto o estudantado coma o profesorado amosaron interese pola iniciativa, ampliando o seu coñecemento sobre os produtos ecolóxicos do mar galego. O obxectivo principal de “Ecolóxicos a mares” é promover e mellorar a comercialización dos produtos ecolóxicos do mar galego. De feito, este convenio nace coa intención de seguir consolidando Galicia coma un referente no sector acuícola nacional e internacional.
Esta campaña permitiu ao estudantado gozar de tapas eco e mariñas, ao tempo que coñeceu máis de preto os produtos ecolóxicos galegos do mar e o seu impacto na economía local e na sostibilidade.
