“Os premiados de hoxe representan os valores que queremos para o noso futuro: innovación, sustentabilidade e compromiso social”
O Salón de Sesións do Palacio Municipal da Coruña acolleu esta tarde a entrega de premios da Confederación Española de Directivos e Executivos (CEDE). A alcaldesa, Inés Rey, presidiu o acto que contou con diferentes figuras destacadas do ámbito empresarial e social. Interviron Isidro Fainé, presidente da Fundación CEDE; Covadonga Toca, directora do IGAPE; José Ramón Rioboo, deputado provincial da Coruña; e Marta Fernández, presentadora do evento. Ademais, contou coa asistencia de empresarios, membros do xurado e autoridades locais.
Rey destacou o compromiso e a excelencia dos galardoados, subliñando a súa contribución ao desenvolvemento: “Desde este Salón de Sesións debatimos e tomamos decisións pensando sempre nunha Coruña máis competitiva e de progreso. Este espírito tamén o vemos nos premiados de hoxe, quen representan os valores que queremos para o noso futuro: innovación, sustentabilidade e compromiso social”. Os premios recoñeceron a seis personalidades e organizacións pola súa destacada traxectoria. En concreto, as persoas premiadas son:
● Premio á Sustentabilidade: Adriana Domínguez, presidenta de Adolfo Domínguez, polo seu compromiso co medio ambiente no sector da moda.
● Premio ao Impulso Empresarial: Raúl López, presidente de Monbus, pola súa aposta pola innovación e a eficiencia.
● Premio á Traxectoria Empresarial: Carmen Lence, presidenta de Lence, destacada por liderar unha empresa familiar cun selo propio.
● Premio á Investigación: Grupo Zendal, pola súa excelencia en biotecnoloxía e compromiso coa ciencia.
● Premio ao Compromiso Social: Carmen Avendaño, presidenta da Fundación Érguete-Integración, recoñecida pola súa loita contra o narcotráfico e o seu impacto social. ● Premio á Empresa Familiar: Grupo Cortizo, por combinar legado e innovación na súa traxectoria empresarial.
