A praza de Ponte Carreira acollerá tamén unha exposición de motos antigas e xogos populares para toda a familia
A praza de Ponte Carreira acollerá este 17 e 18 de setembro a primeira edición da Festa Rural, organizada polo Concello de Frades en colaboración coa asociación de veciños Rexente, a asociación da terceira idade de Frades, a Xunta de Galicia e a Deputación da Coruña. Unha festa que incluirá mercado de artesanía, exposición etnográfica, festival folclórico, verbenas, degustación de callos, exposición de motos antigas, festival de maxia, xantar popular e moitas máis sorpresas.
A festa arrincará ás 16:00 horas do sábado 17 de setembro coa apertura do mercado de artesanía e dunha exposición etnográfica, que se poderán visitar ata as 22:00 horas. A mostra etnográfica recollerá moitos dos útiles e ferramentas do campo e do fogar que foron e seguen sendo os compañeiros cotiás do traballo e da vida familiar no rural.
No mercado de artesanía participarán unha vintena de postos de cestos, coiro, madeira, xoiería, maquetas… Algúns destes artesáns, como o caso do cesteiro, farán demostracións da súa arte en directo para desfrute dos asistentes. Outros, como o posto da Casa Grande de Xanceda (Mesía) farán unha degustación de xeados e incluirán actividades para os nenos e nenas que se acheguen pola praza de Ponte Carreira. A partir das 20:00 horas, o mago Román García presentará o seu espectáculo de maxia dentro do proxecto Galicia Ilusiona. Festival Mundial de Ilusionismo. Ao rematar, terá lugar unha verbena popular co Dúo Élite.
Xantar popular
O domingo 18 de setembro, a I Festa do Rural abrirá as súas portas ás 10:00 horas, coa apertura do mercado de artesanía e os xogos tradicionais para todas as idades, que estarán dispoñibles ata as 22:00 horas. Pola mañá, o grupo ordense Embruxo Gaiteiros protagonizará un pasacalles por Ponte Carreira. A partir do mediodía haberá unha exposición de motos antigas e unha degustación de callos, que serán entregados de balde con cada consumición nun bar emprazado na praza.
A sesión vermú correrá a cargo da orquestra Salsarena, que dará paso a un xantar popular composto por uns entrantes de empanada e xamón, seguido por callos e xarrete con verduras. De sobremesa haberá larpeira e xeado. Pola tarde, de 17:00 a 19:30 horas, terá lugar unha nova edición do Festival Folclórico coa participación dos grupos Sarillo (Aiazo), Medorra con Troula (Galegos) e Carapaus (Santiago). A orquestra Salsarena será a encargada de pechar esta I Festa Rural do Concello de Frades cunha verbena que dará comezo ás 20:00 horas.