A sentenza do Tribunal Superior de Xustiza de Galicia na que se absolvía ao alcalde e ao arquitecto técnico municipal pola demolición das ruínas de Casa Carnicero xa é firme. Finalizou o prazo de presentación de recursos sen que se alegase contra a resolución xudicial.
Esta xa era a segunda sentenza absolutoria emitida polos tribunais en relación a esta actuación do Concello en defensa da seguridade cidadá. Un primeiro tribunal da Audiencia Provincial da Coruña formado por 3 xuíces e un segundo tribunal do Tribunal Superior de Xustiza de Galicia formado por outros 3 xuíces avalaron que a actuación municipal foi legal.
Malia a existencia destas dúas sentenzas, os grupos políticos da oposición que levaban 5 anos intoxicando a opinión pública continuaron na mesma liña durante os últimos días. PP, PSOE e BNG, que nunca se lembraron de Casa Carnicero ata os acontecementos do 2020, intentaron manipular os feitos co obxectivo de eliminar politicamente ao alcalde, pero unha vez máis fracasaron.
