A maxia escénica e os himnos do rock latino chegan a A Coruña en xaneiro da man do tributo recoñecido por Maná e do ilusionista Shado
O Teatro Colón da Coruña abrirá o ano 2026 con dúas propostas escénicas que combinan música, espectáculo e entretemento de primeiro nivel. O vindeiro 16 de xaneiro, ás 20.00 horas, subirase ao escenario Shado, un dos ilusionistas máis recoñecidos do panorama estatal, cun espectáculo participativo e cargado de humor titulado Cleptómago. E o 23 de xaneiro, tamén ás 20.00 horas, será a quenda de +dMANÁ, a banda tributo avalada polos propios Maná, que presentará en A Coruña o seu novo espectáculo musical ¿Dónde jugarán los niños?.
Shado, coñecido pola súa participación en Got Talent, sorprenderá ao público cunha función onde o ilusionismo escénico, o pickpocket, a improvisación e a retranca convértense nos ingredientes dun show irreverente, fresco e próximo, no que cada espectador forma parte activa da experiencia. Cun estilo único e complicidade directa co público, Cleptómago promete unha noite de ilusións imposibles e risas aseguradas.
Pola súa banda, +dMANÁ trae á cidade unha viaxe emocional a través dos grandes éxitos de Maná como “Rayando el sol”, “Vivir sin aire”, “Clavado en un bar” ou “Corazón espinado”, nun espectáculo que recolle o espírito do mítico disco ¿Dónde jugarán los niños? e que conta co respaldo de músicos orixinais da banda mexicana, como Sergio Vallín ou Héctor Quintana, e co apoio dos clubs de fans en España e Italia.
As entradas para ambos espectáculos están xa dispoñibles a través da plataforma www.ataquilla.com , así como nas taquillas habituais da praza de Ourense e do Teatro Colón, desde dúas horas antes do inicio de cada función, sempre que haxa localidades dispoñibles.
Aplicaranse descontos do 20 % para persoas maiores de 65 anos, titulares do Carné Xove e persoas desempregadas, así como un 25 % para familias numerosas, previa acreditación documental tanto na compra como no acceso ao recinto.
O concelleiro de Cultura, Gonzalo Castro, destacou “a importancia de seguir ofrecendo unha programación escénica plural e de calidade, que combine espectáculo e emoción para públicos diversos e conecte coa cidadanía desde distintos formatos”.
Estes dous espectáculos forman parte dunha programación cultural municipal ampla e deseñada para todos os públicos en liña coa política cultural deseñada polo Goberno de Inés Rey, cunha clara aposta pola cultura accesible, dinámica e conectada coas grandes referencias do panorama artístico local, galego, nacional e internacional.
