A Xunta de Goberno Local, reunida hoxe, tomou coñecemento dun informe de diagnose dos muros de Fontiñas, no que se recollen as reparacións urxentes e o plan de mantemento dos mesmos. Tamén deu luz verde ao Campamento de Verán de Surf en Oleiros, do que hoxe se abre o prazo de inscrición, e aprobou a adsrición temporal á concellaría de Acción Cultural, por dous anos, do inmoble situado na rúa do Preguntoiro, número 1, que se destinará a actividades relacionadas coa imaxe cultural do concello de Santiago. Dos acordos adoptados informou a primeira tenente de alcalde, Mercedes Rosón.
O informe do que se deu conta, de data 4 de maio, foi redactado polo departameto de Proxectos e Obras. Fai unha diagnose dos muros de contención de titularidade municipal do barrio de Fontiñas; e nel establécense as reparacións urxentes e o plan de mantemento dos mesmos. Este documento técnico está orientado a definir distintos períodos de catalogación, reparación e mantemento. Divídese en tres fases.
A primeira fase é a catalogación dos muros e a diagnose do seu estado. O documento recolle una serie de actuación preventivas, correctivas e de mantemento, como recolación e ancoraxe de peitorís, consolidación parcial do muro mediante recolocación de perpiaños de granito, limpeza, reparación e/ou dotación de novos elementos de drenaxe, impermeabilización de trasdós mediante obras de pavimentación; e actuación tendentes a diminuir a presión hidrostática.
Estas actuacións preventivas, á súa vez, clasifícanse en fases de actuación no tempo: inmediatas, de menos dun ano; a curto prazo, de entre un e tres anos; e programables, de máis de tres anos.
A fase dous consiste na planificación e predeseño das actuacións clasificadas como urxentes; é dicir, as clasificadas na anterior fase como inmediatas, de menos dun ano. Nesta fase identificáronse tres muros: Rúa de París con interseción da rúa de Moscova, Rúa Bruxelas e Rúa Varsovia; o muro da Rúa de Roma co Parque de Carlomagno; e o muro entre a Praza Sofía e a Rúa do Valiño, que precisan de actuacións urxentes de máis envergadura que as contempladas na primeira fase. Obras como ancoraxes, contrafortes, pantalla de micropilotes, etc, que garantan a súa estabilidade en base ás respectivas hipóteses de cálculo.
A fase 3, contempla un plan de inspección, conservación e mantemento; unha ferramenta que permita sistematizar o mantemento dos muros, levando a cabo un seguimento das patoloxías detectadas nas anteriores fases, coa finalidade de anticiparse a posibles riscos que puidesen derivarse do posible colapso parcial/total dos mesmos.
Na Xunta de Goberno Local tamén se deu luz verde á adsrición temporal á concellaría de Acción Cultural, do inmoble da Casa do antigo Concello, situado na rúa Preguntoiro , 1, para que nel se desenvolvan actividades relacionadas coa imaxe cultural do Concello e a súa promoción. A adscrición é temporal e terá unha duración inicial de 2 anos, prorrogables por outros dous.
Por outra banda, aprobouse o Campamento de Verán de Surf en Oleiros, organizado pola Concellería de Mocidade, cuxo gasto ascende a 8.470 euros. Conta con 20 prazas e desenvolverase entre o 2 e o 9 de xullo de 2021. O prazo de inscrición está aberto desde hoxe, 24 de maio.
Ademais, aprobouse a cesión temporal de distinta documentación, propiedade do Concello de Santiago; para que sexa utilizada en dous proxecto expositivos distintos: “Xacobeo. Las huellas del camino” e “Memorias do Café Derby”.
A maiores concedéronse tres licenzas: unha para a rehabilitación dunha vivenda na Ribeira de San Lourenzo; e outras dúas concedidas á Papelera de Brandía para a construción dunha nave destinada a almacén; e para a reforma e ampliación dun local destinado a oficinas e vestiarios. Estas dúas últimas obras levaranse a cabo na rúa Paseo da Amaia.
Xunta de Goberno extraordinaria e urxente
Ao mediodía tivo lugar unha segunda Xunta de Goberno extraordinaria e urxente, na que se aprobou un expediente de crédito extraordinario por 56.254,65 euros; e un suplemento de crédito por 22.513,63 euros. Estes dous expedientes fináncianse con baixas por anulación.
Este suplemento de crédito de 22.513,63 euros, permitirá ao Concello dar cobertura á licitación do contrato para o selado do vertedoiro de Aríns, e aos gastos técnicos que conleve a actuación.
En canto ao expediente de crédito extraordinario, dívidese en dúas partes: destinaranse 7.900 euros para dotar a achega municipal que lle permita ao Concello de Santiago acollerse á subvención da Xunta de Galicia, do Fondo de Compensación Ambiental para o ano 2021 (DOG nº 15 do 25 de xaneiro de 2021). O obxecto a executar será a adquisición dun vehículo con distintivo ambiental cero emisións para o “Proxecto de sendas peonís dos xiros aos montes de Compostela” que o Concello está desenvolvendo.
Os outros 48.354,65 euros, destinarasen a dotar a achega municipal que permita ao Concello de Santiago de Compostela acollerse á subvención convocada pola Axencia Galega de Desenvolvemento Rural das axudas correspondentes ao Plan de mellora de camiños municipais de acceso a parcelas agrícolas 2021-2022 (DOG nº 19 do 29 de xaneiro de 2021).O obxecto a executar será o acondicionamento de camiño agrícola en Requesende (Sabugueira).
