Galicia conta con máis de 140 casas do maior en funcionamento que ofrecen un servizo de atención nos concellos máis rurais
O director xeral de Maiores e Atención Sociosanitaria, Antón Acevedo, visitou a nova casa do maior do concello de Ponteceso. Con esta nova incorporación, este municipio suma xa dous recursos destas características e que suman dez prazas públicas e gratuítas de atención a maiores.
As casas do maior son un recurso creado pola Xunta para dotar aos municipios máis pequenos de Galicia dun servizo de atención gratuíto para as persoas maiores. Neste sentido, o director xeral destacou que son fundamentais tamén para apoiar a conciliación das familias e fomentar o envellecemento activo e saudable.
Así mesmo, Antón Acevedo sinalou que en Galicia hai en funcionamento máis de 140 casas do maior, distribuídas polos concellos con menos habitantes de comunidade. Ao respecto, fixo fincapé en que esta iniciativa, desde a súa posta en marcha, tivo unha gran acollida polos promotores e unha boa demanda por parte dos cidadáns.
