O pianista compostelán explora a forza evocadora da cor no seu décimo sexto traballo, na compaña de Pablo Martín Caminero ao contrabaixo e Bruno Pedroso á batería. As entradas para o concerto poden ser adquiridas de forma anticipada na web de Compostela Cultura, no despacho de billetes da Zona C e no do Teatro Principal o propio día do espectáculo a partir das 19.30 horas.
Abe Rábade volve ao Teatro Principal de Compostela para presentar en concerto o décimo sexto traballo da súa carreira, Tempo de cor. Farao este xoves, 13 de febreiro, ás 20.30 horas na compaña da súa sección rítimica habitual, con Pablo Martín Caminero ao contrabaixo e Bruno Pedroso á batería.
Editado polo selo Karonte, Tempo de cor é un disco temático sobre a psicoloxía da cor. Inclúe sete temas orixinais inspirados polo poder de evocación do vermello, laranxa, amarelo, verde, azul, púrpura e branco que convidan o público a deixarse bañar por un sinestésico xogo que marida son e imaxe mental. Durante o proceso creativo, Abe contou coa colaboración da artista plástica Beatriz Sáa, quen traballa coa cor como textura e elaborou unha base pictórica que acompaña o traballo na súa versión discográfica física, en soporte virtual e no escenario. O cineasta galego Alfonso Zarauza asina unha versión audiovisual do primeiro sinxelo do disco, ‘Mar de Palabras’.
As entradas para o concerto (12€ con descontos do 50% para diferentes colectivos) poden ser adquiridas de forma anticipada na web de Compostela Cultura, no despacho de billetes da Zona C (rúa do Preguntoiro, 1) e no do Teatro Principal, xa o propio día do espectáculo a partir das 19.30 horas.
Abe Rábade
Pianista e compositor nacido en Compostela, conta con dezaseis discos como líder (Tempo de Cor, o máis recente, editado por Karonte Records no 2024), estreou dúas composicións sinfónicas (Tránsitos no 2015 e Tempos Velados no 2018), outras tres obras poético-musicais (Rosalía 21 no 2008, Travesía dos Poetas no 2010 e Lorca Namorado no 2019).
É autor de 200 composicións en estilos como jazz, clásica, experimental e músicas de raíz. Actúa con numerosas figuras de reconocido prestixio internacional en concertos e festivais de todo o mundo. Así mesmo ofrece múltiples masterclasses en centros especializados.
Licenciado Cum Laude en Jazz Composition e Piano Performance por Berklee College of Music (Boston, EEUU) no 1999, actualmente é docente nos conservatorios superiores de música de Galiza e Portugal.
