· Ao acto de apertura acudiu o alcalde, José Antonio Santiso, xunto a numerosos veciños da parroquia, e membros do goberno local.
· A actuación supuxo un investimento de 78.216,9 euros. Os fondos procederon das arcas municipais e do financiamento proporcionado polo Fondo de Compensación Ambiental da Xunta de Galicia.
O Concello de Abegondo estrea o centro social de Viós tras as obras de renovación acometidas nos últimos meses. O proxecto supuxo unha notable mellora nas instalacións tanto no exterior como no interior para ofrecer un servizo óptimo aos usuarios.
O acto de reapertura do centro social tivo lugar no mediodía de hoxe sábado. Acudiu o alcalde, José Antonio Santiso, xunto a numerosos veciños da parroquia, e membros do goberno local.
A actuación supuxo un investimento de 78.216,9 euros. Os fondos procederon das arcas municipais e do financiamento proporcionado polo Fondo de Compensación Ambiental da Xunta de Galicia.
Coas obras realizouse unha renovación completa da fachada, agora equipada cun sistema de illamento que prevén a aparición de humidades e mellora a eficiencia enerxética do edificio. Ademais, renováronse tanto os canlóns como as xuntas das xanelas, logrando así unha maior protección fronte ás inclemencias do tempo e prolongando a durabilidade da infraestrutura.
No interior do centro social levaron a cabo traballos de pintado, o cambio de portas, a substitución das persianas por estores, a instalación dun novo chan de plaqueta, e a mellora do equipamento da cociña cun extractor de fumes. Así mesmo, o Concello instalou falsos teitos e remates de PVC en todas as xanelas.
Tamén se mellorou a eficiencia enerxética coa colocación de sete focos LED no interior, un foco adicional na entrada con sensor de movemento e cinco luminarias perimetrais.
O Concello tamén construíu un espazo de almacenamento no patio traseiro do recinto, que permitirá aumentar a funcionalidade do centro social e mellorar as súas prestacións para os residentes.
“Hoxe é un gran día para Viós porque dispoñedes dun local que parece novo e que é voso”, expresou Santiso, que destacou que as obras responderon á idea formulada polos residentes. O alcalde cualificou á rede de centro sociais como “imprescindible e estrutural en Abegondo” e por iso as actuacións de mellora nalgunha das dependencias sucédese cada ano.
