· A iniciativa está destinada a nenos e nenas de entre 3 e 16 anos empadroados no municipio e desenvolverase os días 14, 15, 16 e 21 de abril en horario de 8:00 a 15:00 horas.
O Concello de Bergondo pon en marcha un ano máis o seu programa de conciliación durante a Semana Santa, dirixido a facilitar a compatibilización da vida laboral e familiar dos proxenitores e titores traballadores.
Esta iniciativa está destinada a nenos e nenas de entre 3 e 16 anos empadroados no municipio e desenvolverase os días 14, 15, 16 e 21 de abril en horario de 8:00 a 15:00 horas. Durante estas xornadas, os participantes poderán gozar de actividades deportivas, manualidades, educación dixital, inglés, teatro, saúde, sensibilización en igualdade, primeiros auxilios e reforzo educativo. O custo da actividade é de 5 euros por día, con descontos para familias numerosas, persoas rexistradas no Programa de Voluntariado dos Servizos Sociais Municipais e casos en situación de vulnerabilidade segundo valoración da Área de Benestar Social.
As inscricións poderán realizarse desde hoxe, 2 de abril, ata o 7 de abril a través do correo electrónico educacion@bergondo.gal, a sede electrónica municipal ou de maneira presencial na Casa de Cultura en horario de 9:30 a 14:30 horas. O 8 de abril publicaranse as listas provisionais, cun prazo de reclamacións ata o día 9. No caso de que haxa máis solicitudes que prazas dispoñibles, o 10 de abril celebrarase un sorteo público na Casa de Cultura, e o 11 de abril daranse a coñecer as listas definitivas.
O Concello de Bergondo lembra que a actividade só poderá levar a cabo se se alcanza un mínimo de oito participantes por grupo e un máximo de doce. Así mesmo, resérvase o dereito de realizar modificacións na organización por motivos loxísticos ou por requirimentos normativos.
Para máis información, os interesados poden contactar co departamento de Educación no teléfono 981 79 12 52 (ext. 7) ou consultar a páxina web do Concello.
