O concello de Ribeira segue novamente dando pasos en materia de eficiencia enerxética e sustentabilidade con esta nova adxudicación de redacción de proxecto e de execución para rehabilitar o Conservatorio de Aguiño.
As medidas proxectadas para a “Rehabilitación do Conservatorio de Aguiño” supoñen pasar dunha cualificación enerxética D a unha A, alcanzando un aforro do 73,56% no consumo de enerxía primaria de orixe non renovable.
O actual Conservatorio de Aguiño é un edificio dunha tipoloxía construtiva moi básica, construído para unha finalidade na que non era necesario acondicionar correctamente o interior, e que non foi reformado en profundidade. Isto tradúcese nunha demanda de enerxía excesiva para alcanzar valores de confort térmico aceptables para os usuarios. Ademais, presenta un elevado grao de deterioración, que afea a contorna no que se enclava e resta interese para o seu uso por parte dos cidadáns.
Pola outra banda, as instalacións tamén son antigas e moi ineficientes, con sistemas instalados hai 20 anos que foron amplamente superados na actualidade. Esta ineficiencia, unida á mala situación dos cerramentos, provoca un gasto excesivo en enerxía que non redunda ademais na mellora das condicións interiores, ademais de incrementar o custo do mantemento das mesmas.
O proxecto pretendido, tratará de:
1. Incluír un sistema de climatización por aerotermia e renovación de aire con recuperación de calor de alta eficiencia.
2. Mellorar sistemas de iluminación con outros de menor consumo
3. Manter os mesmos usos internos
4.Mellorar o illamento cun sistema SATE exterior protexido cun panelado de madeira termotratada.
5. Incluír un falso teito de madeira no espazo do escenario para mellora acústica
6. Igualar a altura da cornixa coa cumbrera do tellado para ordenar o volume.
7. Igualar a altura da cornixa coa cumbrera do tellado para ordenar o volume.
8. Incluír paneis solares en cuberta
9. Converter as xanelas do espazo do escenar auditorio e da cantina en correderas ata o chan de modo que os espazos do auditorio e da cantina póidanse estender ao exterior facendo un edificio máis participativo.
10. Ocupar cunha bancada exterior o espazo actual de aparcamento que se desprazaría cara ao lateral do edificio de Telefónica para lograr un auditorio exterior.
11. Deplazar a zona de xogos dos nenos a un lateral máis visible desde a rúa para á súa vez permitir un espazo social exterior con grellada enfronte da cantina.
12. Revestir as paredes interiores con paneis acústicos de madeira
13. Introducir un espazo de asento para espera próximo á entrada
14. Utilizar madeira laminada como material estrutural para as novas estruturas
O rexedor, Luís Pérez Barral, afirma que despois das instalacións dos paneis fotovoltaicos do Complexo Deportivo da Fieiteira, Novo Auditorio a da Unidade de Condutas Aditivas (UCA), “con esta futura actuación o concello de Ribeira seguirá ca implementación da eficiencia enerxética en tódalas instalacións municipais para mellorar en aforro enerxético e seguir avanzando na eficiencia enerxética así como reducir as emisións de carbono”. Ademais disto, Pérez Barral destaca que grazas a esta actuación, “Aguiño verá como se mellora un equipamento fundamental na parroquia e que acolle tantos eventos”.
O estudo foi adxudicado CSA Arquitectura por un importe 50.379,32 € e está enmarcado no Programa de Impulso á Rehabilitación de Edificios Públicos (PIREP) do Plan de Recuperación, Transformación e Resiliencia do Goberno de España.
