Na costa carballesa hai cinco zonas de baño controladas sanitariamente: Pedra do Sal, Razo (que a efectos de salvamento divídese en tres: Cabreira, Intermedia e Posto), Arnados (que inclúe tamén a Explanada), Ría de Baldaio e Saíñas. Todas acadan a cualificación de excelente, segundo a clasificación sanitaria que vén de remitir a Consellería de Sanidade ao Concello de Carballo, e que podes consultar no documento anexo.
A Concellaría de Praias ten como principal obxectivo a procura da excelencia en todos os parámetros que determinan a saúde do noso litoral e a calidade dos servizos que se prestan nel. Grazas ao traballo que se desenvolve ao longo do ano, Carballo vén renovando ano tras ano os distintivos Bandeira Azul e Sendeiro Azul para diferentes espazos, e ademais é o único concello da Costa da Morte e un dos poucos de Galicia que conta cos certificados ISO 14001 e EMAS (Certificado do Esquema Europeo de Ecoxestión e Auditoría), que implican un compromiso coa prevención da contaminación, a mellora continua do areal e dos servizos.
Ao mesmo tempo, seguimos a traballar noutros aspectos relacionados coa protección do medio costeiro e dos servizos que prestamos aos habitantes da contorna e tamén aos veraneantes. Neste senso, o Concello de Carballo vén de realizar un investimento de 111.383,40 euros na renovación das pasarelas de madeira a través das cales se realizan os accesos ás praias de Razo e Pedra do Sal, así coma do miradoiro de Razo, e o próximo verán teremos pasarelas accesibles enrolables, tamén de madeira, que ofrecen flexibilidade, adaptabilidade ao terreo irregular e facilidade de uso, ademais de proporcionar un acceso seguro e cómodo, e de ser fáciles de instalar e de almacenar.
Ás actuacións promovidas polo Concello de Carballo, que inclúen tamén as campañas anuais de sensibilización ambiental que levamos a cabo coa colaboración de entidades ecoloxistas, súmanse medidas promovidas por outras Administracións, como o plan de conservación da píllara das dunas, no que traballamos en coordinación coa Xunta de Galicia, ou o proxecto de consolidación dos noiros de Razo que promove a Demarcación de Costas do Estado. Precisamente este martes o alcalde, Daniel Pérez, e os concelleiros de Medio Ambiente e Planificación, Miguel Vales e Juan Seoane, mantiveron unha xuntanza na propia praia con representantes do organismo estatal, que informaron do inminente inicio das obras.
