O pleno de Boqueixón deu luz verde a aprobación dos datos económicos correspondentes ao 2019
A Corporación local do Concello de Boqueixón aprobou en sesión plenaria as contas xerais correspondentes ao exercicio 2019 cos votos a favor do grupo de Goberno e cos votos en contra do grupo da oposición, Veciños de Boqueixón. Malia que todos os grupos recoñeceron que os resultados económicos deste ano eran positivos, dende a oposición matizaron certas puntualizacións referentes aos ingresos das actividades culturais ou a amortización do inmobilizado. Se ben, o grupo popular destacou o remanente positivo de tesourería do Concello, o reducido período de pago a provedores e o feito de que non teñan débeda con ningunha entidade bancaria.
As contas do 2019 consolidaron o punto de central da orde do día do pleno ordinario deste primeiro mes do ano. Tras presentar ante a comisión de contas o balance de 2019, o Executivo local expuxo ante o pleno este documento antes de envíalo á plataforma que o validará.
