O alcalde e o concelleiro de Mobilidade fixeron un percorrido pola vía, que completa a conexión entre a zona urbana de Carballo e o lugar do Outeiro
O alcalde, Evencio Ferrero, e o concelleiro de Mobilidade, Juan Seoane, achegáronse ata Sísamo coincidindo coa execución das obras de aglomerado da estrada, xa na recta final do proxecto de reurbanización dos 1.760 metros de vía que abranguen desde o punto quilométrico 0+810, onde rematara a fase anterior, ata o final da vía no lugar do Outeiro (2+570).
A reforma integral deste treito da estrada provincial DP1901 ten un orzamento de 2.279.527,63 euros, financiados nun 72% pola Deputación da Coruña e nun 28% polo Concello. As obras son executadas pola empresa Vázquez y Reino. Ao longo da vía está a realizarse unha actuación integral, que permitiu completar as infraestruturas de abastecemento e saneamento de auga, tanto no tramo máis urbano coma no rural, e adaptar á vía á mobilidade a un ou dous niveis, dependendo da zona.
Os traballos seguen a mesa liña das fases anteriores: ancheamento e pavimentación da plataforma, construción de beirarrúas de baldosa hidraúlica cun ancho medio de 1,40 metros e dotación de servizos urbanos como saneamento e abastecemento de auga e alumeado con luminarias de LED de acero inoxidable. Tamén inclúen a instalación de mobiliario urbano e o axardinamento.
