A delegada da Xunta informou que a previsión é aprobar o proxecto a mediados deste ano para posteriormente licitar a obra
Estes itinerarios, que se desenvolverán pola marxe dereita da citada estrada autonómica, suman unha lonxitude total de case 2 quilómetros
Con estas actuacións daráselle continuidade aos itinerarios xa executados na AC-433 en Soesto e Serantes, conformando un itinerario continuo e seguro para os peóns
A delegada da Xunta, Belén do Campo, acompañada polo alcalde de Laxe, Francisco Charlín e pola directora territorial da Consellería de Vivenda e Planificación de Infraestruturas, Begoña Freire, supervisaron a zona na que se van a executar novas sendas peonís na estrada AC-433, unha actuación que conta cun investimento de preto de 1M€.
Belén do Campo explicou que o Consello da Xunta aprobou este proxecto que xa está en información pública. Posteriormente aprobarase o proxecto definitivo a mediados deste ano, para licitar a execución da obra.
A delegada recalcou que os traballos contarán cun prazo de execución de 12 meses e terán como obxectivo a execución de dous novos tramos de sendas peonís na estrada AC-433: un primeiro que parte do núcleo de Castrelo uníndose coa senda xa executada en Serantes; e un segundo, que enlaza este núcleo co de Laxe. Estes itinerarios, que se desenvolverán pola marxe dereita da citada estrada autonómica, suman unha lonxitude total de case 2 quilómetros.
De xeito máis concreto, proxéctase un primeiro tramo de senda situado preto de Castrelo, no punto quilométrico 10+494, que finalizará no inicio da senda existente en Cabanas,
O segundo tramo permitirá a conexión entre Cabanas e Finllido, discorrendo entre os puntos 11+731 e 12+428. Neste treito prevense dúas zonas de aparcamentos.
Con estas actuacións daráselle continuidade aos itinerarios executados entre os anos 2022 e 2023 na AC-433 en Soesto e Serantes, no municipio de Laxe, conformando así un itinerario continuo e seguro para os peóns.
O proxecto incluíuse na segunda fase do Plan de Sendas en estradas autonómicas, aprobado no mes de decembro polo Consello da Xunta de Galicia, e prevese que sexa cofinanciado con fondos europeos FEDER 21/27.
