Aínda quedan prazas para as actividades destinadas a nenos e nenas de 6 a 12 anos con necesidades especiais
O programa Rompendo barreiras, impulsado desde as concellarías de Bibliotecas e Igualdade coa colaboración dos centros escolares, regresa ás Escolas do Xardín Agra de Caldas con actividades para nenos e nenas de 6 a 12 anos con necesidades de aprendizaxe da lingua galega para a súa integración social ou con necesidades educativas especiais.
Ti tamén podes é o lema da actividade de inclusión lingüística, coa que pretendemos rachar cos obstáculos de integración social e acceso á cultura dos nenos e nenas de 6 a 12 anos que non coñecen a nosa lingua. Baseándose nunha metodoloxía cooperativa, na que todos/as os/as nenos/as serán partícipes, a educadora social Uxía Verdía traballará vocabulario, gramática e outros aspectos lingüísticos partindo dunha lectura inicial. A aprendizaxe do galego para facilitar a integración social destes nenos e nenas é o gran obxectivo da proposta, que conta xa con 12 usuarios/as.
A rapazada participante no obradoiro Ti tamén podes reunirase en venres alternos de 16.00 a 17.00 horas. No caso de conseguir un número mínimo de nenos e nenas, inmediatamente despois arrincará a segunda proposta educativa, denominada O mundo por descubrir nos libros e dirixida a nenos e nenas de 6 a 12 anos con necesidades educativas especiais.
Neste caso, Uxía Verdía utilizará unha dinámica moi flexible e personalizada para intentar promover o desenvolvemento cognitivo, lingüístico e emocional dos/as participantes mediante experiencias de lectura enriquecedoras e accesibles. As familias interesadas poden informarse ou inscribirse na Biblioteca Municipal Agra de Campos ou a través do enderezo electrónico bibliotecacarballo@carballo.gal.
