O Concello innova este ano no Gran Concurso de Disfraces do sábado 14, onde a votación popular decidirá a repartición dos 1.200 euros en premios.
A festa arrincará ás 20:30 horas nas Pistas de Rabazal coa verbena de Orquéstraa Saudade e continuará o domingo cunha xornada dedicada ás familias
O Concello de Miño ultima os preparativos para a súa celebración do Entroido 2026, que terá lugar a fin de semana do 14 e 15 de febreiro nas Pistas de Rabazal. A programación deste ano chega cargada de música, premios e, sobre todo, unha importante novidade que promete aumentar a participación veciñal: será o propio público quen decida, en directo, aos gañadores.
O prato forte da celebración será o sábado 14 de febreiro. A festa comezará ás 20:30 horas coa verbena a cargo de Orquéstraa Saudade. A esa mesma hora abrirase a inscrición presencial para os atrasados que queiran participar no certame, manténdose aberta ata as 22:00 horas.
“Ti decides”: votación interactiva
A partir das 22:00 horas dará comezo o Desfile e Gran Concurso de Disfraces. Baixo o lema “Este ano, ou público será ou xurado”, o Concello implementou un sistema de votación dixital. Os asistentes deberán acudir cos seus teléfonos móbiles para participar na votación en tempo real e elixir as súas propostas favoritas.
O concurso repartirá un total de 1.200 euros en premios divididos en dúas categorías:
• Individual: Para disfraces de 1 a 3 persoas.
• Grupos: Para comparsas de 4 persoas ou máis.
A entrega de premios está prevista para as 23:30 horas, tras o reconto dos votos dixitais.
Inscricións abertas
Aquelas persoas interesadas en participar no concurso poden inscribirse desde ata o 13 de febreiro enviando un correo electrónico a cultura.deportes@concellodemino.gal. Tamén será posible apuntarse o mesmo día da festa, en horario de 20:30 a 22:00 h no propio recinto.
Domingo de Entroido en familia
A celebración continuará o domingo 15 de febreiro cunha xornada pensada para os máis pequenos. A partir das 17:30 horas terá lugar a Festa de Entroido en Familia, que contará con xogos xigantes, sesión DJ, animación, talleres creativos e un photocall para inmortalizar os disfraces.
O Concello de Miño dispuxo unha carpa nas Pistas de Rabazal para garantir a celebración independentemente do tempo, ademais de baños públicos, servizo de bar e foodtruck durante toda a fin de semana.
