● O Concello publicou a programación de actos para o Entroido, que inclúe opción para todos os gustos e idades.
● O 15 de febreiro terá lugar o desfile de comparsas na Ponte do Porto e o 17 de febreiro será o de Camariñas.
O Concello de Camariñas publicou hoxe a programación completa para o Entroido 2026, que inclúe opcións e actividades nas parroquias adaptadas a todos os gustos e idades, desde comidas, festas infantís, música ou obradoiros aos desfiles de comparsas.
A programación comezará o venres 13 de febreiro, coa festa de Entroido da ANPA O Areal, que se celebrará desde as 17 horas no pavillón Víctor Vigo. O sábado 14 de febreiro ás 17 horas haberá comida de balde no Campo do Allo, con música e DJ a cargo de Disco Móvil Héctor, e ás 21 horas a Comisión de Festas de Camelle organizará, no Campo do Santo, un cocido e cea baile coa colaboración do Concello.
O domingo 15 de febreiro o Entroido chegará á Ponte do Porto co concurso de comparsas. O desfile chegará ás 12:30 horas ao paseo marítimo e repartirase un primeiro premio de 500 euros, un segundo de 300 euros e un terceiro de 200 euros. Ademais, cada persoa participante recibirá 10 euros.
Ese mesmo domingo, 15 de febreiro, tamén haberá Entroido en Xaviña, organizado pola Asociación Abrindo Rejo e o Concello. Desde as 17 horas comezará unha festa de disfraces e degustación de productos típicos do Entroido.
O luns, 16 de febreiro, a partir das 17 horas haberá unha festa infantil no Campo do Santo de Camelle, organizada por ‘Folja da Faneca’.
En Camariñas o Entroido comezará o martes, 17 de febreiro, co concurso de comparsas que se celebrará desde as 12 horas na praza do Mercado (se chove será no pavillón Víctor Vigo). Repartirase un primeiro premio de 800 euros, un segundo de 600 euros e un terceiro de 300 euros. Ademais, cada persoa participante recibirá 10 euros.
O martes, tamén en Camariñas, haberá unha festa infantil e concurso de disfraces a partir das 17 horas no pavillón Víctor Vigo. As persoas asistentes poderán desfrutar de inchables, karaoke, obradoiros, xogos deportivos, comida, DJ e moito máis.
O Entroido darase por rematado o mércores 18 de febreiro co tradicional Enterro da Sardiña, que terá lugar na Casa de Pedra e estará amenizado por DJ Save e Charanga Os Atrevidos.
