A coordinadora do Grupo de Estudos Territoriais da UDC, a carballesa María Andrade, e persoal do concello guiarán unha visita turístico-urbanística na que tamén participarán os concelleiros Xosé Regueira e Milagros Lantes
A Universidade da Coruña acolle o I Seminario Galaico-Brasileiro “Pontes que unen patrimonios”, un encontro entre a CEUB de Brasilia e a UDC centrado no estudo do territorio. Ao longo desta intensa semana, os/as participantes completaron as sesións formativas que se celebran polas mañás na Facultade de Socioloxía con rutas urbanísticas polas cidades da Coruña, Ferrol e Santiago. Hoxe realizarán a última, e o seu destino será Carballo.
O noso concello convértese, tal como explica a coordinadora do Grupo de Estudos Territoriais da UDC, María Andrade, nun exemplo “no que o caos e o feísmo urbanístico se reconverteron, especialmente nos últimos dez ou quince anos, nunha vila máis humana” grazas a un proceso de transformación que permitiu “converter as medianeiras en lenzos, poñer en valor o río ou implantar unha mobilidade slow”, pero que ademais, explica a socióloga carballesa, ten “proxección de futuro”.
A organización do I Seminario Galaico-Brasileiro “Pontes que unen patrimonios” recaeu en Manuel Docampo, que será un dos representantes da UDC que participarán na visita a Carballo xunto con Plácido Lizancos, decano de Arquitectura, e Cristina García Fontán, coordinadora en Paisaxe. Unha vintena de persoas, entre elas alumnos e alumnas das dúas universidades, poderán descubrir un espazo urbano absolutamente descoñecido para eles/as no percorrido que guiarán a propia María Andrade e os traballadores municipais Maite Parga, técnica de Turismo, e Xaime Díaz, autor, ademais, da Guía ilustrada de arquitectura de Carballo. Na ruta participarán tamén o concelleiro de Promoción Económica e Turismo, Xosé Regueira, e a concelleira de Planificación Urbana, Milagros Lantes.
