A iniciativa é impulsada polo Concello coa colaboración da Asociación Pura Raza Cabalo Galego e Poni Club Galicia.
Desde este mediodía o recinto do Castro de Montes Claros conta con cinco habitantes: un cabalo de pura raza galega, dous ponis da raza mini shetland e dúas mulas nacidas dun poni albino. Os équidos estarán de xeito permanente no xacemento e serán os protagonistas do novidoso sistema de control ecolóxico e sustentable con animais da pradería.
A iniciativa é froito da colaboración entre o Concello da Laracha, a Asociación Pura Raza Cabalo Galego e Poni Club Galicia, formalizada hoxe no convenio rubricado polo alcalde, José Manuel López Varela, e o representante legal desa última entidade, Xacobo Pérez Paz.
En virtude do acordo, Poni Club Galicia, que previamente realizara a selección dos cinco animais, os cede -conservando a propiedade dos mesmos- e o Concello comprométese a garantir en todo momento o coidado e alimentación, ademais dos tratamentos sanitarios precisos e a custodia do seu benestar.
As estruturas necesarias para posibilitar a estancia do cabalo, os ponis e as mulas foron creadas recentemente polo Concello a través do obradoiro de emprego, utilizando como material a madeira para unha máis axeitada integración no entorno. Xunto á entrada foi acoutada unha zona que conta cunha marquesiña e será o principal espazo de descanso e estancia dos équidos. Os animais poderanse mover libremente polas parcelas do xacemento que estarán delimitadas mediante a colocación dun pastor que os orientará cara os espazos nos que terán maior facilidade para atopar alimento.
Ademais, nos accesos construíronse abeiros coa dobre función de delimitar o Castro para que os animais non saian do recinto e, ao mesmo tempo, permitir que as persoas que acudan visitar o Castro poidan protexerse e evitar o contacto cos équidos se así o desexan.
O Castro de Montes Claros convértese, así, nun dos primeiros xacementos galegos que empregará este sistema natural para a súa limpeza, conservación e mantemento. Con esta novidosa iniciativa o Concello pretende continuar poñendo en valor o sitio mediante a súa mellor conservación diaria cun sistema que evita o emprego de medios mecánicos sobre o xacemento, favorece a recuperación da paisaxe tradicional e, ademais, supón un aliciente para atraer visitantes.
O Castro de Montes Claros actualmente está a ser obxecto dunha escavación arqueolóxica impulsada polo Concello que dá continuidade á recentemente rematada e que fora financiada pola Xunta de Galicia.
